كود هناء ابو علي كازا ///

عرفات عدة مناطق فالمغرب، خصوصا فالجنوب بحال مراكش وأكادير، تغيرات ملحوظة فدرجات الحرارة من الاسبوع لي فات ، حيث تبدلات الأجواء بشكل غير معتاد فهاد الفترة من السنة، وحتى كازا اللي معروفة بالجو المعتادل ديالها، ما كانتش بعيدة على هاد التغير، وهو الشي اللي خلا بزاف ديال الناس يحسو باللي الصيف قرب يبان قبل الوقت ديالو، ولكن في نفس الوقت خلاهم يتسائلوا على سبب هاد التساقطات لي كتعرفها المملكة يعني واش غادي نعيشو صيف قبل من وقتو أو العكس ؟

وفي هاد السياق، أوضح حكيم الفلالي الخبير فالأرصاد الجوية فتصريح خاص لـ“كود” أن الوضعية الجوية اللي كيعرفها المغرب حاليا مرتبطة أساسا بدينامية جوية إقليمية، حيث كان تقدم ديال كتل هوائية مدارية سخونة جاية من الصحراء، وهو ما أدى إلى ارتفاع درجات الحرارة حتى فالمناطق الساحلية، بالتزامن مع اقتراب منخفض جوي أطلسي من غرب أوروبا، اللي جاب معاه هواء رطب للمنطقة.

وأضاف أن التقاء هاد الكتل الهوائية المختلفة فدرجة الحرارة خلق حالة عدم استقرار جوي، بحيث كينزل الهواء البارد لتحت وكيطلع الهواء السخون للفوق، وكيبرد وكيوقع التكاثف، وهو ما يفسر تشكل السحب والتساقطات المتفرقة اللي تسجلات، خصوصا البارح 6 أبريل 2026

وأشار إلى أن تزايد ظاهرة التصحر فالمناطق المدارية وشبه المدارية كيساهم فارتفاع حرارة رياح الشركي اللي كتأثر على المغرب خلال فصل الصيف، وهو ما قد يؤدي إلى عيش أجواء صيفية بشكل مبكر.

وأكد الفيلالي أن هاد السيناريو سبق ووقع فسنوات 2016 و2020 و2022 و2023، حيث تم تسجيل موجات حرارة مبكرة وبشكل استثنائي.

ومن جهة أخرى، شدد الخبير على أن استمرار هاد الظواهر كيطرح تحديات كبيرة، خصوصا فمجال تدبير الموارد المائية وضرورة التأقلم مع التغيرات المناخية، معتبرا أن ما كايوقع اليوم ممكن يولي هو القاعدة فالمستقبل.