كود كازا ///

عرف المغرب فالموسم الفلاحي الحالي 2025-2026 تساقطات مطرية مهمة، حيث وصل المعدل الوطني حتى لـ 462 ملم ما بين شتنبر 2025 ومارس 2026، بارتفاع 56% مقارنة مع المعدل ديال 30 عام، وزيادة كبيرة وصلت حتى 134% مقارنة مع العام اللي فات.

وهاد الوضع خلا حتى نسبة ملء السدود تتحسن بشكل كبير، حيث طلعات من حوالي 27% فـ2025 إلى قرابة 70% فـ2026، وهو مؤشر إيجابي على تحسن المخزون المائي بعد سنوات من الجفاف.

وفهاد السياق، أشار محمد طاهر السرايري، أستاذ باحث بمعهد الحسن الثاني للزراعة والبيطرة، فتصريح خاص لـ”كود”، إلى ان التساقطات الأخيرة ممكن يكون عندها دور مهم، خصوصاً فإنتاج الحبوب اللي كتشكل ركيزة أساسية فالفلاحة المغربية، وكتأثر حتى على تغذية الماشية، الشي اللي يقدر يخفف الضغط على الاستيراد ويعاون فاستقرار الأثمنة.

ومن جهة أخرى ، وضح الخبير ل”كود” حقيقة الوضع الفلاحي لبلادنا بحيث قال إن المغرب كيعاني من نقص مائي هيكلي، حيث 80% من الأراضي الفلاحية كتعتمد غير على التساقطات، مقابل غير حوالي 20% اللي كيتسقا، وأن هاد الوضع خلا الإنتاج الفلاحي فبزاف ديال السنوات ما كيكفيش الطلب الداخلي، الشي اللي دخل المغرب فواحد التبعية الغذائية، بحيث كميات كبيرة من المواد اللي كاينة فالسوق كتجي من الخارج، بحال الحبوب والسكر والأعلاف وحتى بعض المنتوجات الأخرى.

ودعا الخبير فتصريحو ل”كود” للتفاؤل، إذ اعتبر أن هاد التساقطات ممكن تكون بداية انفراج بعد سنوات الجفاف، وقد تعطي دفعة قوية للإنتاج الوطني وتعاون على استقرار السوق وتخفيف الضغط على الأسعار فالفترة الجاية.