گود سبور//

كاين تطور جديد فـ الحالة الصحية ديال الدولي المغربي اشرف حكيمي نجم باريس سان جرمان الفرنسي، اللي مقاتل باش يبرا ويشارك فـ كاس افريقيا “المغرب2025″، بعدما توعت قبل أسبوعين فـ رجليه ملي ضربو الكولومبي لويس دياز لاعب بايرن ميونخ خلال مباراة الفريقين فـ دوري أبطال أوروبا.

التطور الجديد اللي عرفاتو الحالة الصحية ديال اشرف حكيمي، هو انه اليوم الخميس رجع للتداريب مع باريس سان جرمان ماشي فـ التيران غير فـ لاصال، ولكن واخا هكاكا فهذا راه مؤشر إيجابي بزاف، حيث دار تمارين رياضية فـ لاصال مع الگروب، وهادي اول مرة يتريني معهم ملي توعت، حيث كان گالس فـ الصبليون كايرتاح ويتريني بوحدو.

هذا المؤشر راه مهم بزاف، خصوصا وان اشرف حكيمي حيد الطروتينيت اللي كان كايحط عليها ركبتو باش يتمشى باش بلاما يحط رجليه ليمنية فـ الأرض، حيث هي اللي موعت فيها فـ الشوفيا، وهذا المستجد كايبين ان جسم اللاعب كايتفاعل مع الدوا والعلاج مزيان، على أمل انه يكون واجد باش يلعب مع المنتخب الوطني المغربي كاس افريقيا من الاول ديال البطولة اللي غاتبدا يوم 21 ديسمبر الجاي.