وكالات//

واحد الدراسة جديدة بينات نتائج مشجعة على دوا واعر سميتو “لوروندروستات”، اللي باين عليه فعال بزاف فخفض الطونسيو عند الناس اللي كيعانيو من ارتفاع مزمن وما كتنفعش معاهم العلاجات العادية.

الدراسة داروها فجامعة كاليفورنيا فسان دييغو، وشارك فيها 285 مريض، 190 منهم خداو “لوروندروستات”، والباقي خداو دوا بلا فعالية (بلاسيبو)، وكلشي بقا كيتناول الأدوية اللي كيستعملوها من قبل.

النتائج بينات أن الناس اللي خداو “لوروندروستات” نقص عندهم الطونسيو الانقباضي بحوالي 15 نقطة، مقارنة مع 7 نقط فقط عند المجموعة اللي خدت البلاسيبو، حسب ما قال موقع”Sci Tech Daily”.

الدواء كيركز على مشكل فهرمون “الألدوستيرون”، اللي هو واحد من الأسباب الرئيسية فارتفاع ضغط الدم اللي ما كيتجاوبش مع العلاج.

ورغم أن بعض الحالات ما استجابتش مزيان، الباحثين شافو أن النتائج واعدة، وكيعتابرو هاد الدوا بصيص أمل للمرضى اللي ما نفعاتهمش الأدوية التقليدية.

ومن المنتظر يديرو تجارب أخرى أوسع فالمستقبل باش يتأكدو من سلامة وفعالية “لوروندروستات”.