وكالات//

كيستعد الممثل البريطاني الشهير روان أتكينسون، اللي معروف بشخصية “مستر بين”، يرجع للشاشة فموسم جديد من كوميديا بعنوان Man vs. Baby، اللي غادي يكون تكملة للمسلسل ديالو السابق Man vs. Bee، وغادي يتعرض على نتفليكس.

فهاد الجزء الجديد، غادي يرجع أتكينسون يلعب نفس الدور ديال تريفور بينغلي، اللي كانت عندو حياة هادئة من بعد المشاكل اللي تسبب فيها النحلة فالموسم الأول. ولكن داك الهدوء ما كيطولش، حيت كيلقى فراسو وسط مغامرة جديدة، منين كيطلبو منو يسهر على واحد الدار فخمة فـلندن، فالعطلة ديال نويل.

المشاكل كتبدى نهار آخر يوم فالدراسة، منين كيعرف أن طفل من مشهد الميلاد فالمدرسة ما جا حتى شي حد ياخدو، وكيضطر ياخد الرضيع معاه للقصر اللي كيسهر عليه. ومن تم، كتبدى المواقف المضحكة والغريبة كتولي كتزاد، وكيولي الموسم مزيج ما بين الكوميديا العائلية والمواقف العجيبة اللي كيتعرف بيها أتكينسون.

وكان أتكينسون قال فواحد الحوار مع نتفليكس فـ2022، بأن الإلهام ديالو فالكوميديا كيجيه من المواقف اللي عاشها فراسو، وبأنه ديما كيبغي يدخل لحظات شخصية فالأعمال ديالو. وزاد ضاحك: “كلنا وقعات لينا شي مواقف غريبة، بحال كيفاش نشعلو طواليط جديد ولا كيفاش نخدمو جهاز إلكتروني ما عمرنا شفناه!”