وكالات//

منصة نتفليكس خرجات الإعلان التشويقي والبوستر الرسمي ديال الموسم الثالث من المسلسل الكوري المعروف “لعبة الحبار” (Squid Game)، اللي دار نجاح عالمي كبير من نهار بدا فـ2021، ودابا راجع بجزء جديد اللي كيتوقعو يكون هو الفصل الأخير فهاد السلسلة الدرامية اللي مشوقة بزاف.

الإعلان فيه لقطات مشحونة بالتوتر اللي تعودنا عليه فالمسلسل، وكيبان فيه الجنود المقنعين كينقلو تابوت كحل وسط ساحة اللعب، وكيشد الانتباه البطل “جي هون” بلون شعره الأحمر، اللي كيدل على واحد التحول كبير فالشخصية ديالو واستعدادو للمواجهة. الإعلان تسالى بجملة: “جا وقت اللعب للمرة الأخيرة”.

أما البوستر الدعائي، فجا غامض وعامر بالرموز، كيبين مواجهة جاية ما بين “جي هون” و”الرجل المقنّع ” (Front Man)، وفالنص كاينين الرموز المشهورة ديال اللعبة (الدائرة، المثلث والمربع)، ومعاهم عبارة “The beginning of the end” اللي كتعني بداية النهاية الحاسمة.