إصابةااااكود سبور//

مهدد الدولي المغربي نايف أگرد بالغياب على المنتخب الوطني المغربي فالماتشات الجايين ضد كل من الگابون وليسوتو ضمن إقصائيات كأس إفريقيا “المغرب2025‘‘، بسبب إصابة تعرض ليها البارح الخميس مع الفريق ديالو ريال سوسيداد الإسباني.

وحسب موقع comuniate الإسباني، فنايف أگرد توعت فالماتش ديال ريال سوسيداد الإسباني ضد فيكتوريا بلزن التشيكي، ضمن منافسات اليوروبا ليگ، وحس المدافع المغربي بشي ألم فالركبة ديالو في انتظار نتائج الفحوصات وهذا الشي واخا كمل الماتش.

نفس المصدر وضح أن مدرب ريال سوسيداد، إيمانويل ألگواسيل، كان خايف فالمؤتمر الصحافي بعد الماتش، بسبب الحالة الصحية ديال نايف أگرد، ودابا اللاعب غايدير فحوصات طبية باش يعرفو شنو عندو بالضبط.

وكان الناخب الوطني وليد الركراكي دار نايف أگرد فلاليست المنتخب المغربي اللي فيها 26 لاعب استعدادا لمواجهة كل من الگابون وليسوتو ضمن الجولتين 5 و6 من إقصائيات كاس إفريقيا، اللي ديجا مؤهل لها المغرب حيث هو البلد المنظم.