كود سبور//

تهرس الدولي المغربي يوسف بلعمري فالعمود الفقري ديالو، ملي كان لاعب مع الرجاء الرياضي فالماتش الأخير ضد فريق المغرب الفاسي، الجمعة الماضي، برسم الدورة 8 من البطولة الاحترافية.

وحسب الرجاء الرياضي، فاللاعب يوسف بلعمري عندو دوبل فراكتير ففقرات العمود الفقري، والهرس اللي عندو ما خاصاهش عملية جراحية، ولكن خاصو علاج خاص تحت إشراف الطاقم الطبي للفريق.

وغايگلس يوسف بلعمري مدة 4 أسابيع ما يلعبش، باش يبرا ويرتاح، وإصابة اللاعب تعتبر خسارة للرجا حيث هو من أحسن اللاعبين فالفريق، وخسارة للمنتخب المغربي حيث كان خدا الرسمية كظهير أيسر والمتتبعين قالو أنه حل مشكل هذا البوسط اللي شحال والناخب الوطني وليد الركراكي وهو كايقلب له على حل.