الرئيسية > كود سبور > خاليلوزيش مغبون وزعفان حيث ما غيمشيش مع المنتخب المغربي لقطر
13/08/2022 16:00 كود سبور

خاليلوزيش مغبون وزعفان حيث ما غيمشيش مع المنتخب المغربي لقطر

خاليلوزيش مغبون وزعفان حيث ما غيمشيش مع المنتخب المغربي لقطر

كود سبور//

شعر المدرب البوسني المقال من تدريب المنتخب الوطني وحيد خاليلوزيش بحزن كبير حيث تفارق مع المنتخب الوطني المغربي، فهاذ الوقت لي كان كيوجد فيه باش يشارك معاه فكأس العالم لي غتكون فقطر فنونبر لي جاي.

وحسب مصادر مطلعة فالناخب الوطني المقال خاليلوزيش وخلال توديعو للأطر الوطنية لي اشتغلت معاه فالطاقم التقني ديال المنتخب المغربي عبر ليها على الحزن ديالو بسبب هاذ الفراق لي مكانش باغيه، حيث حرمو من المشاركة مع الأسود فالمونديال ديال قطر.

المصادر نفسها كشفت على أن وحيد خاليلوزيش كانت عندو عروض فالفترة لي فاتت، ولكن البوسني كان متمسك بحلم المشاركة فكأس العالم، حيث هو الهدف لي كان باغي حققو من بعدما تحرم منو فالسنوات الماضية مع المنتخب ديال الكوت ديفوار ومع اليابان.

للإشارة فالجامعة الملكية المغربية لكرة القدم علنت على الانفصال ديالها على وحيد خاليلوزيش بالتراضي قبل يومين، وطبعا هذا الانفصال جاء بسبب مجموعة ديال المشاكل ما بين المدرب البوسني ولاعبين مغاربة بعدهم من ليكيب ناسيونال.

وهاذي هي المرة الثالثة لي كيأهل فيها خاليلوزيش منتخب لكأس العالم وما كيمشيش يشارك معاه فيه، فقبل من المنتخب المغربي وقعت ليه مع الكوت ديفوار فمونديال 2010، ومع اليابان فمونديال 2018، وكتبقى المشاركة الوحيدة ديالو فكأس العالم هاذيك لي كانت فمونديال 2014 مع المنتخب الجزائري وصل فيها للدور الثاني.

موضوعات أخرى

25/09/2022 13:30

واش الرئيس الكيني خوا بالمغرب فقضية الصحراء؟.. مصدر لـ”كود”: نيروبي غاتمشي مع الرباط وكاينا حرب دبلوماسية كبيرة ولقاءات مكثفة والاعلام المعادي كيدير المزايدات