الرئيسية > كود سبور > خاليلوزيتش جبد النحل على راسو: المحليون عندهم النقص فالفيزيك والكرتي خاصو يطيح البوا.. واش هاد المدرب قبط منتخب رايب
12/10/2019 21:00 كود سبور

خاليلوزيتش جبد النحل على راسو: المحليون عندهم النقص فالفيزيك والكرتي خاصو يطيح البوا.. واش هاد المدرب قبط منتخب رايب

خاليلوزيتش جبد النحل على راسو: المحليون عندهم النقص فالفيزيك والكرتي خاصو يطيح البوا.. واش هاد المدرب قبط منتخب رايب

مصطفى الشاذلي – كود سبور//

وحيد خاليلوزبتش، مدرب المنتخب الوطني مازال معارفش ٱش باغي منذ تعيينه ناخبا وطنيا هادي شهر ونصف.

الشيء الوحيد، لي كايعرف يدير هاد المدرب هو انتقاد عمل الفترة السابقة، لأنه في كل مرة كيقول أنه في طور البناء ومازال خاص تصحح بزاف ديال الحوايج وأكثر من ذلك أنه مازال كيقلب على لعابة جداد، بحالا زعما منين جا لقا المنتخب رايب ما فيه والو، والعكس هو الصحيح.

بينما المنتخب الوطني كان خاصو تغييرات بسيطة بحال يلقا لي يعوض مبارك بوصوفة وكريم الأحمدي والمهدي بنعطية لي اعتزلوا اللعب مع المنتخب.

وبدل ما يحافظ على هاديك الروح لي كانت عند المنتخب المغربي وهاديك لاگريسيفيتي منين كانت كاتضيع الكرة، ولينا شايفين منتخب تائه ولاعبين تخربق ليهم اللعب بعد التغييرات في التاكتيك والتمركز.

هادشي خاصو يعرفو المدرب البوسني خاليلوزيتش رآه مقبطش منتخب رايب، رآه دخل على مجموعة كسبت قلوب الملايين في المونديال ودارت مشكل كبير لإسبانبا والبرتغال في روسيا، وأكثر من ذلك كان مستوى اللعابة مزيان في كأس إفريقيا في مصر لولا اخطاء المدرب هيرفي رونار فماتش بنين، لأنه كان عارف راسو غادي يمشي.

خاليلوزيتش ارجع مختص في التصريحات لي كتخلق الجدل، البارح صرح مرة أخرى أن المنتخب المغربي خاصنا نصبرو عليه، يعني ما تكلموش معايا على أي لقب أو كاليفيكاسيون للمونديال. وأكثر من ذلك أكد بلي اللاعبين ناقصهم الفيزيك وجبد إسماعيل الحداد، ووليد الكرتي لي گال عليه أنه خاصو يطيح البوا على الأقل ثلاثة ديال الكيلوات.

إلا كان هادشي صحيح ومقتنع بيه، علاش عيط ليهم للمنتخب الأول من الأصل، وهما محسوبين على المنتخب المحلي، لي كايتسناه ماتش صعيب كونتر الجزائر في الإقصائيات المؤهلة إلى نهائيات كأس إفريقيا للمحليين.

هادي قمة التناقض فاش جا گال بالحرف إنه كيستغرب عدم توفر المنتخب الوطني على لاعبين من البطولة وفراقي كثار بحال الوداد والرجاء البيضاويين وحسنية أكادير ونهضة بركان لعبوا المسابقات الإفريقية ووصلو للفينال وفيهم لي ربح لاكوب، ودابا كيگول انهم يعانون من اللياقة البدنية، ما فهمناش واش لي عندو مشكل فالفيزيك غادي يمشي بعيد فالكومبيتسيون افريكان.

باختصار، هادوا لي ماعجبوهش علاش معيط ليهم وحارم عموتة منهم، هو باغيهم واربح بيهم بوركينافاسو والنيجر.

المدرب خاليلوزيتش، لي قلب المنتخب رأسا على عقب، نوض فضيحة على وليد الكرتي ودابا كيگوا في حقه لعاب مزيان ولكن خاصو يطيح الوزن، اش من وزن زائد عندو، الوزن عندو زايد في سوق.

النقص عندك في سوء تقديرك لمستوى المنتخب المغربي بلا ما تحاول تقنع المغاربة بشي حاجة ما كايناش. المغاربة مقتنع بأن الخدمة لي دار رونار ما كانتش كاملة خايبة صحيح أنه أخطأ فشي حوايج منين تصاحب مع بعض اللعابة والسماسرية، ولكن كيف ما كان خلا المنتخب واقف خاصو روتوشات أوصافي.

الكرة عند رئيس الجامعة فوزي لقجع، لي خاص يجبد ليه ودنين هاد المدرب شوية باش يركز في خدمتو لأننا لسنا في حاجة مثل هذه التصريحات التي كضر المنتخب المغربي أكثر ما تنفعو. أما التغييرات لي دار بالمنتخب بان وراها شي حاجة أخرى ما شي رياضية وفنية لان لو كان هادشي صحيح كون أكدت الفعالية ديالها فهاد الماتشات لي دازو. خاص غير لي يفهم ويستوعب.

موضوعات أخرى

20/10/2019 22:00

ولد “إل تشابو” أكبر بزناس فالعالم دار ليهم داكشي ديال “الجوكير”.. شدوه البوليس وصحابو ناضو حيحو فالزنقة والبوليس طلقوه – فيديو

20/10/2019 21:37

خاص..نايضا ف لقاء المكتب السياسي لـ”البام”: تفويض بنشماش لتدبير انتخابات رئاسة جهة الشمال وتزكية “الحساني” لخلافة العماري