گود سبور//

طاحت قناة الرياضية المغربية واحد الطيحة خايبة، ملي دوزات إشهار ديال شركة القمر الروسية 1XBET  على الشاشة ديالها بالتزامن مع ماتشات كأس إفريقيا د العيالات “المغرب 2024” اللي بداو البارح السبت.

وفالوقت اللي كان حذر فيه فوزي لقجع الوزير المنتدب المكلف بالميزانية ورئيس الجامعة الملكية المغربية لكرة القدم، من التعامل مع شركة 1XBET  حيث الأنشطة ديالها غير قانونية، ناضت قناة الرياضية دوزات واحد الكبسولة إشهارية ديال هاد الشركة البارح السبت 5 يوليوز 2025، قبل من ماتش المغرب وزامبيا ضمن افتتاح كأس أفريقيا للعيالات، والمصيبة ما وقفتش عند هذا الحد، ولكن هذا الإشهار كان مسيء للمغرب وفيه مس بالوحدة الترابية ديالو.

الإشهار ديال شركة القمر الروسية اللي داز فقناة الرياضية فيه خريطة المغرب مقسومة، وهادي هي المصيبة الكبيرة، حيث كيفاش قناة رسمية بحال قناة الرياضية يطيحو المسؤولين ديالها فهاد الغلط الكبير والفادح، اللي كايمس بسيادة المغرب والوحدة الترابية للمملكة المغربية، ويدوزوه على القناة اللي كايتفرجو فيها الملايين د المغاربة.

هاد الغلط الكبير اللي طاحو فيه المسؤولين على قناة الرياضية، خاص يتفتح بسبابو تحقيق ويتعرف شكون بالضبط المسؤول اللي تسبب فيه، حيث ماشي من المعقول أن المغرب والمغاربة مجندين للدفاع على الوحدة الترابية ديال المملكة منذ سنوات وعقود طويلة، ويجي مسؤول مقصر فالخدمة ديالو يدير غلط كارثي بحال هذا ويدوز إشهار مسيء للمغرب على قناة رسمية مغربية.