كود الرباط//

الوالي ديال جهة مراكش اسفي، مجايب خبار، دازت ايامات على الزلزال وبدا كيراقب الصحافة، ونسا بلي جاو اجانب ودخلو للمغرب وصورو بالدرون بلا ترخيص.

اييه حسب معلومات “كود” أجانب دخلو وصورو بتقنية الدرون بلا ترخيص، دارو فيديو واعر بزاف صور لقطات من جبال اقليم الحوز وبينو الاضرار لي فيه، بدواوير تردمات كامل والركام لي شاط الزلزال.

هاد الفيديو بالدرون خرج ونشراتو ميدي 1 تيفي، يمكن معارفوش بلي تصور بدون ترخيص، والسلطة مفراسهاش.

هادي دازت على الوالي لي مصيفط فريق كيسولو طاقم صحفي ديال فجامع الفنا، الميكرو فيه “كود” السلطة اكيد عارفا بلي الموقع عندو ترخيص ديال التصوير ورغم ذلك جاو ارا لاكارط نشوفوها نصوروها واش عندكم ترخيص وغيرها من الاسئلة.

الغريب هاد الوالي نفسو مخلي المؤثرين كيستغلو صور الاطفال باش يربحو، تجار الازمات، كيجيبو شراوط والحليب وشي علب ديال السردين ومانط وكيصورو بلي كيديرو الخير فالمساكن لي رابو ليهم ديور والامهات لي ماتو ليهم وليداتهم ورجالهم.