الرئيسية > آراء > خاص وزير صحة صحيح ماشي بحال هادا كل نهار كيعفي مسؤول. المغرب غادي يخلص بزاف على فضايحو التواصلية وعلى فشلو فاقناع لمغاربة بخطورة الوضع مع هاد الجايحة
06/08/2020 09:00 آراء

خاص وزير صحة صحيح ماشي بحال هادا كل نهار كيعفي مسؤول. المغرب غادي يخلص بزاف على فضايحو التواصلية وعلى فشلو فاقناع لمغاربة بخطورة الوضع مع هاد الجايحة

خاص وزير صحة صحيح ماشي بحال هادا كل نهار كيعفي مسؤول. المغرب غادي يخلص بزاف على فضايحو التواصلية وعلى فشلو فاقناع لمغاربة بخطورة الوضع مع هاد الجايحة

كود – هناء ابو علي ////

اللي فكر يجيب خالد ايت الطالب وزير للصحة خرج على لبلاد. وزير ضعيف فشل فشل كبير فتدبير هاد الجايحة. وزير عوض ما يركز على اولوية الاولويات اللي هي وقاية لمغاربة من هاد الڤيروس٬ حقاش عارفين خروب بلادنا. ما نقدوش على العلاج٬ قلنا عوض التركيز على هاد لشي دخل فحروب داخلية كلشي خرج خاسر منها. هو لوزير براسو حقاش شتتات تفكيرو وتركيزو على الجايحة واطر الوزارة حقاش كلشي ولى خايف من قرار منو يقدر يطيرو فاي لحظة والرأي العام اللي ما فاهمش واش هادي وقت هاديك القرارات.

يقدر يكون عندو مبررات شادة غير هو ماشي وقتها دابا. كيفاش لبلاد طلعات فيها حالات الوفيات بزاف بزاف ومعاها حالات الاصابات ووزيرنا فالصحة كيعفي مناديب الصحة. اخر عنترياته اعفاء عزيز مخلوف، مندوب الوزارة بعمالة انزكان ايت ملول، وادريس بوحاحي، مدير المركز الاستشفائي الاقليمي بانزكان. المصيبة انهم بحال اللي سبقوهم غاديين يمشيو للمحكمة الادارية ونسبة كبيرة يربحوه كيف وقع فالسابق مع زملاء ليهم.

يعني واش هاد الوقت ديال لمضاربة بالبيانات ولملاجة فالمحاكم. وسولو هاد ايت الطالب اللي سبق دخل فحرب مع مدير مديرية الأوبئة كاع محمد اليوبي ومع مدير المدرسة الوطنية للصحة العمومية وبجوجهم مع اخرين قدمو استقالتهم.

البارح حطمنا روكور. تصاب 1283 واحد بكورونا ومات 18 مغربي ومغربية هاد الشي ف24 ساعة وعندنا 108 فالإنعاش يعني حالتهم خطيرة.

مع هاد الارقام وزير الصحة غابر لا يتواصل مع المغاربة. هاد الفشل الدريع ليه فالتواصل لعب دور كبير فهاد الارتفاع الكبير لاعداد المصابين.
كيفاش فهاد الجايحة ناض ايت الطالب كيتعلم لحجامة فراس لمغاربة. كل نهار جايب مسؤول فالندوة الصحافية. اللي هي ماشي ندوة غير تخربيقة.

هاد الوزير من الاسباب اللي خلى لمغاربة ما يصدقوش اللي كيتقال ليهم على كورونا فيروس. كون كانت ندوات صحافية حقيقية بصحافيين كيسولو وماشي غير صحابو وحبابو. كاع الاعلام المغربي٬ بنقاشات على كلشي كيف كتكون فدول بحالنا وقريبة منا. كان يكون نقاش على اسباب ارتفاع عدد الوفيات واسباب ارتفاع الاصابات وعلاش لبحورا عامرة وعلاش وعلاش وعلاش… كانت قرارات هاد الوزارة بحال منع دخول او الخروج من 8 مدن قبيل العيد لكبير تحترم وقبل هاد الشي الناس تنخارط فيها.

وزارة ما كتواصلش مع المغاربة ما كديرش فيديوهات تحسيسية وتنبه للخطورة وتوظف الاعلام السمعي البصري العمومي والخصوصي راهم يخدمو فابور باش يلادنا تخرج من هاد الجايحة.

وزير خاصو يجي مع الوضع ولى مقود مع مسؤولين حكوميين اخرين فالندوات الصحافية يوميا مع هاد التحول اللي كنعيشوه مع الفيروس. راه كيقتل كثر من 10 فالنهار فالايام الاخيرة والاصابات ولات كتفوت الف. يعني مرحلة الخطر.

حتى قراراتها باللي لمغاربة اللي فيهم كورونا بلا خطورة خاصهم يبقاو فديورهم جا بطريقة عشوائية. ما شرحو ما فسرو. هو النيت عطى تبريرات ما شاداش باش اكد ان الدولة غادية تتكلف بكلشي المصابين وشفنا ناس كيغنيو وكيشطحو وكيلعبو فمستشفيات متنقلة بحال ديال بنسليمان٬ دابا خدا قرار معاكس هو تالف.

ماشي عيب اللي جاب هاد ايت الطالب يقول راني خطأت وخاصو يتبدل. يجيبو وزير يعرف اولا غير يتواصل مع لمغاربة. بلا نجاح عملية تواصلية كل سياسة عمومية مصيرها الفشل. خاصك تقنع. خاصك تتواصل.

هاد الشي ما يمكنش مع هاد ايت الطالب. هو المسؤول على جزء من اللي عشناه وكنعيشوه.

موضوعات أخرى

01/10/2020 21:30

حصيلة كورونا فالأقاليم والجهات اليوم: غير 4 دالمديريات اللي علنات على التفاصيل.. و1250 إصابة جديدة فكازا سطات.. وأعلى نسبة دالشفاء كانت فسوس لليوم الثالث