كود الرباط//

قال محمد الصديقي، وزير الفلاحة والصيد البحري والتنمية القروية والمياه والغابات‎، في تصريح لـ”كود” بلي الحكومة كتشجع عمليات الاستيراد ديال زيت الزيتون باش ميطلعش الثمن بزاف.

وأوضح الصديقي لـ”كود”: “منذ 2021 إلى الآن كاين انخفاض في إنتاجية زيت الزيتون بناقص 50 في المائة، لذلك منعنا التصدير”.

وأضاف المتحدث: “وهذه السنة قررنا تشجيع الاستيراد باش يكون ضغط على السوق وباش المعامل المغربية تستمر في الاشتغال”.

وأوضح وزير الفلاحة: “الاستيراد ديال زيت الزيتون ديما كاين، والجديد دبا هو تنويع مصادر الاستيراد ونحاولو نحيدو رسوم الاستيراد على باقي الدول الأخرى لي غادي نفاتحو عليها وغايتم تسهيل مساطر خصوصا المراقبة الصحية باش يتم التسريع”.

وعن ثمن زيت الزيتون هاد العام، واش غادي يهبط ولا يبقى فمستوى ثابت، قال وزير الفلاحة: ” كنحاولو باش يهبط ثمن زيت الزيتون بهاد الإجراءات”.

يشار بلي الإنتاج ديالنا فزيت الزيتون كان كلى لعصا بزاف فمناطق كثيرة منها القلعة ومراكش وبني ملال وقل الإنتاج فبلايص اخرى بسباب الجفاف.

العام اللي فات كان ثمن ليطرو ديال زيت العود بـ90 درهم٬ دابا كاينة توقعات يطلع بـ30 درهم لليطرو أي ابتداء من 120 درهم.

وحسب تصريح وزير الفلاحة لـ”كود”، فباش يبقى الثمن على الأقل كيف كان العام اللي فات أو ينقص شوية غادية تشجع الحكومة باستيرادو من دول أخرى وغايتم إعفاء المستوردين من ضرائب الاستيراد وتسهيل مساطر المراقبة الصحية.