كود الرباط//

حصلت “كود” على وثائق حصرية، حول عقار ضخم بمدينة طنجة، تبلغ قيمته السوقية حاليا ما يقارب 2 مليار، سبق وشراه موظف بسيط بالمديرية الجهوية للضرائب بمدينة طنجة سنة 2018، قبل أن يرتقي تدريجيا في سلم الوظيفة ليصل إلى منصب مسؤول للضرائب بكل من أكادير ومراكش، في السنوات الأخيرة.

وحسب وثائق عقد البيع التي حصلت عليها “كود”، فراه هاد الموظف السابق بالمديرية الجهوية للضرائب بطنجة، ويشتغل منصب رفيع بإدارة الضرائب بمراكش، شرا عقار فيه 2299 متر كاري مع شخص آخر، شرا النص باسم بناتو لي كانو ديك ساعة قاصرات، ف 2018.

وبلغت قيمة العقد باش شرا ديك ساعة 2299 متر كاري ما يناهز 580 مليون سنتيم  (ما يقارب 6 مليون درهم)، شراه بسم بناتو للي كانو قاصرات وعاود شرا النص الاخر. فيما بعد.

المهم العقد كيقول بلي شرا هاد العقار بالكاش، وهو موظف بوزارة المالية ف طنجة، وفق العقد، يعني الفلوس مادازتش عند النوطير.

المهم هاد المسؤول حافظ صواريه، خصوصا وأنه دار حق الانتفاع لراسو وحق الرقابة لبناتو باش لا يبيعوه” يعني غير وظفهم فهاد العقد وهوما معندش سن الرشد.

ويشاع أنه اشترى حصص اخرى من نفس العقار، ودبا كيساوى تقريبا شي جوج مليار ف أحسن موقع بطنجة.

الموظف في المديرية العامة للضرائب، للي شرا هاد العقار بقيمة 580 مليون سنتيم في طنجة، وسجّل جزءًا منه باسم بناتو القاصرات، وفي نفس المرحلة، وبالضبط ف 2019 اقتنى شقة ثانية في إفران باسم ابنتيه، بقيمة 54 مليون سنتيم.

بذلك يصل مجموع الأملاك كثر من 630 مليون سنتيم، وهو رقم كبير يُطرح حوله التساؤل في ضوء الدخل النظامي لموظف في الضرائب. وطريقة الشراء.

وحسب العقد فقد أدى الموظف المحظوظ ثمن العقار الأكبر خارج مرأى الموثق.

هاد المسؤول كثير الغياب ف الإدارة، وعندو تاريخ كحل ملي كان فطنجة ثم أكادير ودبا مراكش. ناس الضريبة عارفينو، خصوصا ناس كازا ورباط ووجدة.

مديريات الضرائب خصها زلزال فالمغرب كامل، ماشي غير مراكش ولا أكادير، خص دماء جديدة، وفق مصادر من الإدارة، وخاص الأسماء القديمة تمشي بحالها، وهنا خاص المدير العام للضرائب قيطوني يبين حنت يديه، كما أن وزيرة المالية مطالبة تجلس مع مدير الضرائب وتصلح المشاكل لي واقعة .

المغرب مقبل على مشاريع المونديال، وخاص بالضبط هاد المديريات ديال الضرائب لي فيهم المشاكل يشدهم أطر قافزين، وراهم موجودين كثار مدراء إقليميين ومسؤولين بالإدارة المركزية خصهم يهبطو للتيران ويديرو الحكامة. البلاد خصها تنقا ماشي غير المنتخبين الفاسدين بل حتى من الإداريين لي عليهم شبهات. وهلم جرا.