كود الرباط//

سعد الدين العثماني، الأمين العام السابق لحزب العدالة والتنمية ورئيس الحكومة السابق، كيواجه حلمة “خبيثة” وكاين ترجع داخلي باش يتمنع من المشاركة فالمؤتمر الوطني للحزب لي غا يتعقد يومي 26 و27 فالرباط بمشاركة 1600 مؤتمر وحضور شخصيات وطنية وأجنبية.

حاليا، كاينة حملة قوية ضد العثماني داخل البيجيدي كيقودها تيار معارضي التطبيع لي كيتاهمو سعد الدين العثماني بمباركة التطبيع بين المغرب وإسرائيل بعدما وقع فدجنبر 2020 على الإتفاق الثلاثي بين المغرب والولايات المتحدة الأمريكية وإسرائيل، وهو الإتفاق لي بموجبه عتارفات الولايات المتحدة الأمريكية بسيادة المغرب على صحراءه.
حزب العدالة والتنمية كيعيش غليان داخلي بسبب توقيع أمينه العام السابق على هاد الإتفاق الثلاثي، لكن سعد الدين العثماني ما وقعش بصفتو امين عام البيجيدي، ولكن وقع بصفتو رئيس حكومة المملكة المغربية تحت الاشراف المباشر للملك الممثل الأسمى للأمة.
تيار معارضي التطبيع داخل البيجيدي، لي بطبيعة الحال من حقو يعارض قرار استئناف العلاقات بين المملكة المغربية ودولة إسرائيل، باغي يركب على الموجة ديال تعاطف الشعب المغربي مع الشعب الفلسطيني فهاد المرحلة لي كتعيش فيه الساكنة فقطاع غزة أزمة إنسانية فظيعة بسبب العدوان الإسرائيلي من جهة وبسبب أيضآ الكارثة لي تسببات فيها حركة حماس منذ الهجمات “للي وصفاتها منظمات حقوقية” ب”الإرهابية” لي دارت ف 07 أكتوبر 2023 ولي بسببها وقعات حرب مدمرة خلفات عشرات الآلاف من الضحايا المدنيين أغلبهم نساء وأطفال.
لي زاد أزم الأوضاع داخل حزب العدالة والتنمية بسبب هاد القضية هو رفض جبهة التضامن مع الشعب الفلسطيني لي كتسيطر عليها جماعة العدل والإحسان مشاركة اعضاء وقيادات حركة التوحيد والاصلاح وحزب العدالة والتنمية لي كتتاهمو بالتطبيع مع إسرائيل فالمسيرات التضامنية مع الشعب الفلسطيني لي كتنظم فالعديد من المدن المغربية.

هاد الشي دفع بالقيادي فالبيجيدي عزيز هناوي يشن حملة على سعد الدين العثماني، مدعوم من طرف قياديين فحركة التوحيد والإصلاح، باش يضغطوا على سعد الدين العثماني يقدم استقالتو من الحزب ويتحمل بوحدو تبعات هاد التوقيع.

بطبيعة الحال، عبد الإله بنكيران، لي باغي يبلاصي إدريس الازمي أمين عام للحزب فالمؤتمر المقبل، باغي يشعل العافية فالعثماني باش يرد ليه الصرف على قبوله تعيينه رئيس الحكومة فبلاصتو ف 2017.
مصادر قالت بلي سعد الدين العثماني، منذ مغادرنه للحكومة، يلتزم الصمت ويتصرف بمنطق رجل دولة عارف مصلحة المغرب ويحترم التعهدات والاتفاقيات. لكن الحسابات السياسوية ديال بعض القياديين فالبيجيدي كتبين بلي ولاءهم للجماعة والطائفة ولحسابات ضيقة بعيدة عن مصلحة الوطن.

مهم فهاد الفيلم كامل، البي جي دي عندو ازمة داخلية كبيرة، ازمة قيادة وازمة رؤية سياسية، حزب مقدرش يدير تقييم موضوعي للمرحلة ولا يدير مراجعات حقيقية تصالحو اولا مع مصالح الوطن وتصالحو كذلك مع التطورات للي كيعيشها المجتمع. وينقص من كثرة البكائيات ويبعدو من مشاكل الشرق ويركزو على بناء المغرب للي مقبل على تظاهرات عالمية كبيرة بحال المونديال.