كود مدريد /////

واش رجال الاعمال الصبليونيين غاديين يستثمرو فالصحرا، خاصة بعد دعم حكومة مدريد للحكم الذاتي وتأكيد مجلس الامن على ذلك فقرارو، هاد السؤال سولاتو “كود” فاشغال المنتدى الاقتصادي المغربي الاسباني بمدريد اليوم لاربعا 3 دجنبر 2025، لرئيس الباطرونا ديالهم انطونيو گاراميندي. جوابو ل”كود” كان ديبلوماسي. كان موقف حكومة بلادو الاشتراكية مع مغربية الصحراء. قال ل”كود” باللي رجال الاعمال فمنظمة ارباب المقاولات للي كيرأسها كيدرسو الآن وكيقيمو الوضعية القانونية وعليه غاديين ياخذو القرار.

واضاف بخصوص اش غاديين يستثمرو ولا اللا؟ رد گاراميندي انو ماشي هو او المنظمة اللي كيرأسها اللي غادي يقول ليهم يستثمرو ولا للا وفين ممكن ليهم يستثمرو.
واعاد التذكير باللي  بعد تقييم الوضعية غادي نشوفو وياخدو القرار.

لكنو استطرد فتصريحو ل”كود” “ما باغيش ندخل فالسياسة. الشركات عندهم الامكانية يستثمرو فين بغاو وفالقطاع اللي بان ليهم” واكد “ماشي انا اللي غادي نقول ليهم اش يديرو. الشركات كيملكو قرارهم بيديهم. كيختارو المكان والقطاع”

بخصوص زيارة رجال اعمال من كناريا للداخلة باش يشوفو امكانية الاستثمار قال رئيس الباطرونا الصبليونية ل”كود” “رجال الاعمال ديال كناريا بحال رجال الاعمال ديال اسبانيا كيختارو فين يستثمرو”