مصطفى الشاذلي – كود ///

علاش مدرب الاسود وحيد خاليلوفيتش ما حاملش حكيم زياش بالاخص. ما بغاش يديه معاه لكأس افريقيا للامم اللي دارت فالكاميرون. وحيد ذكر كثر من مرة باللي وقعو مشاكل بلا ما يعطي تفاصيل. ذكر باللي عطاه عميد المنتخب ولكن ما يمكنش حتى حد يفرض عليه شي حاجة وباللي مشى من المنتخب الياباني باش حاولو يفرضو عليه لعاب فالمنتخب.

العميد كان هو المهدي بنعطية وجا بعد مبارك بوصوفة وبعدو مع المدرب الحالي للاسود عطاها لزياش باش يرفع ليه المورال وبعدو خداها رومان سايس.

زياش كان خدا العمادة بعد ما كان مكروه فالمنتخب بسباب البيلانتي اللي زگلو فثمن نهاية كأس افريقيا للامم بمصر امام منتخب البنين فاخر دقايق الماتش.

لكن اللي ما بغاش يقولو وحيد لحد الان هو ان السبب الحقيقي للي خلاه ما يبقاش يعيط على زياش. وفق ما علمته “كود”٬ كان السبب هو هو محاولة زياش فرض جوجت الامور عليه باش كان عميد للمنتخب. مصدر “كود” اكد ان زياش امر مدرب الاسود يعيط على زكريا لبيض للمنتخب. ماشي غير هاد الشي٬ يضيف مصدر “كود”٬ بل فرض عليه يكون نصير المزواري اللي كان كيعلب معاه ف”اجاكس”٬ يكون اساسي فالفرقة. اي يلعب فبلاصة احسن لعاب فالمنتخب اشرف حكيمي.

هاد الشي علاش وحيد كيهدر على التماسك وعلى الفرقة ديما. عارف ان لعابة كيفرضو على المدرب لعابة خراين كيعني تشتث المنتخب. هاد الشي كان المنتخب عاشو قبل. كانو مدربين بشخصيات ضعيفة ماشي بحال هادا. راه حربي بصاح بمعنى الحقيقي والمجازي