كود احمد الطيب الرباط ///

علمت “كود” ان تطبيق منع مسيرة الاحد اللي دعات ليها “الجبهة المغربية لدعم فلسطين ومناهضة التطبيع” و”مجموعة العمل الوطنية من أجل فلسطين. المغرب” بالرباط غادي يكون عندو اجراءات اخرى.

وحسب مصدر “كود” فقد صدرت مذكرة للسلطات فالولايات والاقاليم باش ما يخليوش اللي باغيين يتحداو المنع ويجيو للرباط. حسب مصدر “كود” غادي تمنع نقل الكيران للرباط من غير للي كيسافرو. حسب مصدر “كود”٬ حتى هادوك صحاب الهوندات والطونوبيلات اللي غادي تلقاهم السلطات خارجين من مدنهم فاتجاه الرباط او فمداخل العاصمة غادي يطبقو معاهم القانون: اللي هاز شي حد غادي يعتابروه نقل سري وفيها سحب البيرمي والمتابعة كيف كينص عليها القانون.

هادو صحاب المسيرة اللي كيدعموها تيارات اسلامية خاصة العدل والاحسان والعدالة والتنمية اللي كان الحزب اللي وقع التطبيع مع اسرائيل٬ دارو شعار “الشعب المغربي مع طوفان الاقصى وضد التطبيع”. شكون عطاهم الحق يهدرو باسم الشعب المغربي؟ حتى واحد.