كود سعيد الشاوي ////

اشاعة طيرات عامل النواصر جلال بنحيون. العامل اللي ماشي طويل باش جا خرجو عليه اشاعة باللي تم اقالتو بعد ما تم تطبيق القانون فقصر لكريملن فالارض الفلاحية ببوسكورة.

حسب مصدر رسمي ل”كود” فان العامل يقوم بمهامو فالعمالة. اي ان ما تقال فايك وصافي.

مصادر اخرى من عمالة النواصر اكدات ل”كود” باللي بوسكورة تحولات ل”درس وطني فالحكامة” وبللي سالى زمن التساهل اي ان القرارات الادارية ما بقاتش شكلية او قابلة للتجاوز.

مصادر “كود” اكدات ان السلطات ما غادياش تتساهل مع المنتخبين وباللي اي انحراف غادي يوصل مولاه للمساءلة

الدولة من خلال السلطات حاسمة، تضيف مصادر “كود”، فحماية المجال الفلاحي وباللي غادية تحارب كل شخص استغلها خارج القانون

وشددت المصادر انو بعد تحديث منظومة التعمير فان اقليم النواصر ما غاديش يبقى منطقة للاختلالات وغادي يولي خاصع للرقابة واللي حصل يودي
بالنسبة لهاد المصادر فان درس قصر لكريملن ماشي غير اختبار لقدرة الادارة على فرض القانون بل رجعات منو درس وطني شعارو “ما كاين حتى شي حد فوق القانون” وما كاينش شي حد كيستثمر خارج الشرعية