كود مراكش ///

علمت “كود” ان اشهر مآثر مراكش غادية تبقى مفتوحة فوجه السياح. يتعلق الامر وفق مصدر من مندوبية وزارة الثقافة بمراكش ل”كود” بكل من قصر لبديع والباهية وضريح السعديين. هادو وفق مصدر “كود” ما تضرروش بزاف من زلزال ليلة 8 شتنبر اللي فات. مصدر “كود” اكد باللي الاجزاء المتضررة فهاد المآثر التاريخية واللي ما كتفوتش 30 بالمائة هي اللي غادية تغلق فوجه السياح

وزارة الثقافة اللي كان الوزير الوصي على القطاع فزيارة لمسجد تينمل٬ غادية تعلن الاثنين المقبل طلب لمكاتب دراسات باش يوجدو فظرف اسبوع بواسطة مهندسيهم وخبرائهم يقترحو فيها دراسة لترميم هاد المآثر.

وحسب مصدر من وزارة الثقافة ل”كود” فان الترميم غادي يبدا فاكتوبر المقبل.

الملك كان علن على كلفة 120 مليار درهم على 5 سنين لاعادة اعمار الاقاليم اللي ضربها الزلزال: لحوز ومراكش ووارزازات وشيشاوة وازيلال وفيها كاين عمليات ترميم المأثر التاريخية اللي شي تابع لوزارة الثقافة وشي تابع لوزارة الاوقاف وشي لمؤسسة متاحف المغرب