كود أكادير//

علمت “كود” من مصدر مطلع بأن المديرة العامة لمنظمة اليونسكو، أودري أزولاي، جات لأكادير وتابعات كرنفال بيلماون وخدات لمحة عليه وعلى الإبداع لي فهاد التراث الفني بسوس.

أودري أزولاي عجبها بزاف الحال ملي شافت التناغم والتناسق بين الفرق الأمازيغية والإفريقية للي لبسو أزياء تنكرية وقدموا لوحات فنية.

أزولاي تلاقات مع والي جهة سوس ماسة سعيد أمزازي ومع مسؤولي كرنفال بيلماون، وعبرات على الافتخار ديالهم لهاد التطور لي كتعرف الثقافة الفرجوية بسوس والاهتمام ديالهم بالتراث.

من الحاضرين كذلك، كفاءة مغربية تنتخبات فهاد اليومين لرئاسة المجلس الدولي لتنسيق برنامج اليونسكو حول الإنسان والمحيط الحيوي، وذلك لولاية تمتد لسنتين، وهي لطيفة يعقوبي المديرة العامة للوكالة الوطنية لتنمية مناطق الواحات وشجر الأركان.

المنظمين ديال كرنفال بوجلود، كيفكرو باش يزيدو يطوروه اكثر ويكون عندو إشعاع دولي ومشاركات من أوروبا وامريكا اللاثينية والانفتاح اكثر على إفريقيا لي شاركت هاد العام بـ4 دول.

دبا كايتوجد عمل كبير، باش يكون بوجلود تراث فني وطني ودولي، ويتصنف فاليونسكو كتراث ثقافي وفني عندو جدور تاريخية قديمة ويتحافظ عليه.