أنس العمري -كود///
قضية المضاربة فباركينغ فسلا لي تجبدو فيها زعيترات خدات مسار مكانش منتظر. فوفق ما علمته “كود”، فإن ملف هاد القضية رجع عند مصلحة الشرطة القضائية فالمدينة، بعدما سبق وتحال على النيابة العامة المختصة، إثر إنهاء مسطرة البحث فيه.
وحسب ما توفر لـ”كود” فإن الملف ترد، أخيرا، للبوليس من أجل إجراء الصلح بين طرفي هاد المضاربة، ولي كلا فيها الدق مواطن مغربي، يحمل الجنسية الأمريكية، والذي تعرض لكسر فنيفو، أدخل على إثره إلى مصحة، قبل ما يدير شهادة طبية تثبت مدة العجز في أزيد من 30 يوما، ولي موجبة للاعتقال.
وكان بوليس المنطقة باشر تحقيقاته في القضية، بعد ما دار المعاينة نهار الواقعة، والذي صادف الـ19 من نونبر الماضي، بالاستماع إلى أشخاص، تقدموا على أنهم شهود على الحادث. بينما من المرجح يتحولوا إلى مشتكى بهم، على اعتبار أن الأمريكي الجنسية، جبد سمياتهم ضمن لي تكرفسو عليه.
وكانت “كود” روات فمقالات سابقة قصة هاد المضاربة لي وقعات. وجا فيها أن الحادث بدا بخلاف بسيط قبل ما يتطور وطاحت مرا بنص وملي راجلها بغى يدافع عليها حتى هو كلى طرحة لعصا. وأكثر من ذلك، هاداك اللي ضربهم ما قدوش هاد الشي.. ومشى عيط على الرونفور من الزعيترات. ولي ملي وصلو كرفصو ورفسو على الراجل ومراتو.