سامي العلوي-كود كازا //
من بعد هبط قاضي التحقيق بمحكمة الاستئناف كومناف الاسبوع المنصرم 8 من عناصر الدرك الملكي للحبس ديال عكاشة .
كشفات مصادر “كود ” ،ان البارح الاثنين بالليل قرر قاضي التحقيق بمحكمة ديال كومناف بكازا ايداع 8 موظفين ديال جهاز الدرك الملكي ومن بينهم 3 ديال الروؤساء مراكز ترابية تابعين للقيادة الجهوية ديال ابني ملال سجن عكاشة ،على خلفية ملف مسطرة مرجعية ديال جوج بارونات المخدرات نواحي بني ملال ،كان شدو سنة 2022 من طرف عناصر الفرقة الوطنية ديال البوليس بني ملال ومن بعدما حجزو الهاتف ديال هذا الجوج بزناز ولي صابو فيه تسجيلات صوتية وفيديوهات تتوثق عملية الارتشاء بالاضافة الى ارقامهم الهاتفية .
المصدر ديانا تضيف ،ان هذا المجموعة ديال الجندارم لقرقب عليها قاضي التحقيق مورط فملف الارتشاء وافشاء السر المهني والتستر على بارونات مخدرات بالمنطقة والتستر على شخص مطلوب للعدالة والمشاركة في هذه الأفعال الإجرامية ويتعلق الامر بثلاثة ديال رؤساء مراكز ترابية ،بالاضافة الى خمس عناصر ديال الجندارم برتب مختلفة كانو خدامين بالمراكز الترابية والقضائي التابعة للقيادة الجهوية لدرك الملكي بني ملال .
المصدر نفسه قال ،ان هذه قرار قاضي التحقيق جاء بعدما احال الوكيل ديال الملك فمحكمة الاستئناف ديال كازا المتهمين ملتمس من قاضي التحقيق اجراء تحقيق معهم ،وذلك بعدما قدموهم عناصر الفرقة الوطنية الأبحاث القضائية التابعة لجهاز الدرك هذا المجموعة يوم يوم امس الاثنين ،وذلك بعدما انهت عناصر الفرقة الوطنية ديال الجندارم مسطرة البحث التمهيدي بخصوص المسطرة المرجعية ديال جوج بزناز كبار كانو خدامين بجهة بني ملال .
المصدر ذاته قال، ان عناصر الفرقة الوطنية ديال الجندارم غادي تحيل مجموعة اخرى ديال الجندارم فالايام القادمة لمورط مع هذا تجار المخدرات ،وذلك بعد انتهاء مسطرة الاستماع وتحليل اثار جنائية تتعلق بالمكالمات مع البزنازة ولي تشير مصادرنا انها مكونة من 15 عنصر ديال الجندارم جرى استدعاهم الى مقر الفرقة الوطنية ديال الدرك الملكي بثكنة شخمان .
