محمد سقراط-كود///
لبارح شفت واحد الفيديو الصراحة بكاني بقوة الحكرة المجانية والكلاخ لي فيه، واحد المواطن درويش عندو سيكانز وكيبيع الحوت في السواق، فاق في الصباح تقدى شي صنيدقات ديال السردين ومشا بيهم للصوق يترزق الله، ولكن بعض المغرر بهم من سكان المنطقة جراو عليه وحرموه من مصدر الرزق ديالو، بدعوى أن السردين خاصو يتباع بخمسة دراهم، وللأسف السيد مكان عندو حتى شي خيار من غير أنه يقلب الروايض ويمشي يقلب على راسو فشي سوق آخر، أو يبدل الحرفة على ماتدوز هاد الحملة ديال هركاوة،وهادي ماشي حادثة إسثتنائية بزاف ديال الحواتة حاليا كيبعانيو مع هاد الإشاعة لي طلق عبديلاه المراكشي ديال أن السردين ثمنو في المرصى غير تلاتة دراهم وخاصو يتباع بخمسة، وللأسف عوض السلطة تتأكد من هادشي ناض الوالي إستقبلوا جوج مرات بحال الى كيعطي مصداقية من طرف الدولة على هدرتوا، حتى خرج كيقول أن الملك بغا المغاربة ياكلوا الحوت رخيص وعبيدلاه لي غادي يحقق هادشي.
السردين ديال تلاتة دراهم مكانيش مكاينش في المرصى أو في سوق الحوت، كيمشيو الحواتة لي كيدورو غير بصندوق أو جوج يترزقو فيهم الله مكيلقاوش هاد الثمن، وفاش كيتقداو صندوق باش يدوزو النهار كيدورو بيه بين الدروبة عالله يصورو فيه مية درهم، كيلقاو بنادم باغي يشري الحوت بثمن تيك توك وفايسبوك، خمسة دراهم هاد الثمن ماوصلوش السردين شي عشرين عام هادي، راه فتنة كبيرة دار عبديلاه لأنه ماشي غير نقص الثمن ولكن كذب وزاد في الكذوب والوالي عطاه مصداقية لهاد جيب أفم وقول.
خاص عبديلاه المراكشي يجيب الدليل بالوثائق بلي السردين كيشريه هو بتلاتة دراهم في المرصى وكيبيعو بخمسة ورابح فيه، وإلا فراه كذاب وفتان وباغي يدير صداع كبير في البلاد، سلعتو من حقو يبيعها باش بغى أو يفرقها فابور ولكن مايكذبش على المغاربة ومايحرمش رزق الدراوش لي كيدورو بصندوق فوق بيكالة ولاو كيجريو عليهم الناس، دابا أي واحد مكيبيعش السردين بخمسة دراهم ولاو كيشوفوا فيه الناس على أساس شفار وشناق ومن كروش لحرام، وهو غير ولد الحومة لي قهراتو البطالة جاب صندوق ديال السردين غادي يترزق فيه الله والى شاطت ليه مية درهم مايقولها لحد، حتى ولينا نشوفوا الجماهير الشعبية كتطرد خوتها الحواتة من السواق، هنا راه كاين خلل وكاينة فتنة نائمة الى مشات حتى كبرات لن تبقي ولن تدر، وللأسف وزارة الداخلية عوض تدخل وتصحح الوضع وتتأكد من مصادر الحوت لي كيجيب والثمن شحال طاحى عليه، ناض الوالي كيستقبلوا وخلق منو بطل مغربي ضد الغلاء، بينما الواقع كيقول عكس هادشي، مكاين حتى شي دليل ديال أن عبديلاه كيدخل لدلالة بحالو بحال باقي البياعة والشراية وكيتقى الحوت كيف قال بتلاتة دراهم ويخرج يبيعو، لي فهمنا من خلال مقال كود هو أنه كاين مرفح سيفط ليه كاميو ديال السردين يبيعو باش بغى، وكذلك المحال لي فتح في أكادير باش يبيع الحوت، حتى بالمنطق ماجاياش مراكشي جاي لأكادير باش يبيع ليهم الحوت رخيص، راه صرح مول المحال أنه مكاريش ليه عاطيه الحانوت فابور تعاطفا معاه، إذن هنا راه ميزان المنافسة أصلا مال لجهة عبديلاه، ويمكن ليه يبيع باش بغى ماتابعوا كرى ما تابعاه مصاريف، وعاد فلوس لأدسنس ولايفات في تيك توك داخلة، حنا بغينا الحقيقة الى كان هاد السيد كيشري الحوت كيف قال بتلاتة دراهم ويبيعو بخمسة ورابح فيه، إذن يشارك المعلومة مع ولاد الشعب الدراوش لي كينرزقو الله غير بصندوق وجوج يوريهم فين هاد الحوت ديال تلاتة دراهم، أو راه كذاب وينشر إشاعات كاذبة كتضر بالسوق وبالبياعة والشراية لي ولاو كيتعرضوا لحملات مقاطعة مجانية وحتى للعنف بحال داك السيد لي جراو عليه.
