الرئيسية > آراء > خاص شي دراسة سوسيولوجية دار على لمهاجرين لي غا شادين الفلوس و كايفرقوهم و كايسيفطوهم لمن والا عبر الانترنيت باش يدير زعما زعما يدير الخير ! واش بصح الهدف ديالهم هوا الخير بحد ذاتو و لا كايبغيو يبانو ؟ و لا باغين غا الحسنات و جمافو على الخير!
19/07/2019 15:00 آراء

خاص شي دراسة سوسيولوجية دار على لمهاجرين لي غا شادين الفلوس و كايفرقوهم و كايسيفطوهم لمن والا عبر الانترنيت باش يدير زعما زعما يدير الخير ! واش بصح الهدف ديالهم هوا الخير بحد ذاتو و لا كايبغيو يبانو ؟ و لا باغين غا الحسنات و جمافو على الخير!

خاص شي دراسة سوسيولوجية دار على لمهاجرين لي غا شادين الفلوس و كايفرقوهم و كايسيفطوهم لمن والا عبر الانترنيت باش يدير زعما زعما يدير الخير ! واش بصح الهدف ديالهم هوا الخير بحد ذاتو و لا كايبغيو يبانو ؟ و لا باغين غا الحسنات و جمافو على الخير!

سهام البارودي – كود//

ماعمري ماشفت شي حد كايدير الخير و باغي يدير الخير كايستقبل فلوس الناس فويسترنيونيون و لا فالكونط ديالو ! و ماعمري ماشفت شي حد كايدير الخير كايعطي ميا فلميا منوقتو للخير و كايخرج يگول بلي ماكايشد والو من دوك الفلوس ! يعني نتا كاتفيق من السبعةد الصباح تال التسعود د الليل و نتا سوا ديزو كادير الخير و ماخدام ماردام و كاتقول بليماكاتقيسش فلوس عباد الله! خاصك تكون نتا هوا المهاتما غاندي شخصيا !

نايض صداع كبير من مول الكاسكيطة و الزروالي مؤخرا على الاعمال الخيرية ! نتا نصاب لا نتا لي نصاب و جبدو الضواسا الخامجين ديال بعضياتهم و ترونات القضية!

انا ماسوقيش طبعا فمول الكاسكيطة و لا الخروالي و لي لقا شي هوتة و كايغمس فيها سوقو هاداك و ماكاينينش غير هوما فحالهم بزاف ! و دابا مع جاي العيد الكبير ماكاين غا هز كاميرا و بدا تسعى عباد الله فالفايسبوك و اليوتوب يعاونوك دير مبادرة ” كبش العيد ” باش تشري الحوالى و تفرح الحازقين ! و غاينوضو الحوالى و غايسيفطو الفلوس لشي حد ماكايعرفوهش باش يشري الحوالى للمرة الألف و الحازق غايشوي بولفاف و غايشوي المصارن و غايشنشط القلاوي و يدردر عليهم الملحة و الكامون و دوز ثلت يام د العيد و غايبقا حازق و شاد فالقلاوي و لا جديد تحت الشمش!

و لكن لي مابغاتش تفهم ليا هوا هاد الناس لي كاينوضو بلا جدا عليهم يهزو من فلوسهم ويعطيو لواحد كايعرفوه غي فالانترنيت باش يعاون ناس اخرين و يدير الخير ! غيرحيت شافوهداير فيدوات على حالات انسانية ! كانشوف بلي خاص شي دراسة سوسيولوجية دار على هادالفئة لي انا شخصيا كاتجيني مضبعة ! كاتساهم فانتشار النصب و الاحتيال و لي كانلقاوهاكثيرة فصفوف المهاجرين لي عايشين برا ! واش عندهم شي احساس بالذنب اتجاه الوطنكايحاولو زعما يداويوهم بفحال هاد الاعمال الخيرية ؟ واش شايطين عليهم الفلوس باشيلوحوهم بهاد الطريقة ؟ واش تسطاو ؟

ايه طبعا هوما احرار يلوحو فلوسهم تا فالبير سوقهم هاداك و تاواحد ماغايقدر يمنعهم ! و لكن هاد التصرف كايخليني نسول راسي واش لي كايدير الخير بهاد الطريقة كايكون فعلا باغي يدير الخير من اجل الخير و لا باغي يدير الخير حيت اناني و باغي يربح شي حاجة فالدنيا و لا فالآخرة !

واحد النهار وانا كانتناقش مع واحد صاحبتي على الصدقة سولتها علاش كاتصدق على شي واحد باينة فيه مامحتااااجش ! شفار ! نصاب ! هاز دري صغير كاريه فالشموش باش يسترزق بيه ؟ علاش كاتشجعو على الاتكالية و يولفها ساهلة ! جاوباتني ” انا كانعطيها لله و ربي عالم بنيتي غايجازيني عليها ” ! هااا ! ياك آ بنت الحاج ! قولي نتي كاتصدقي بأنانية ! ماشي مهم واش ديك الصدقة غاتعود بالنفع و لا لا و واش غاتمشي ل غايستاحقها و لالا ! الاهم بالنسبة لهاد النوع ديال المحسنين هوا الرصيد ديال الحسنات لي جمعو فحالا عايشين كايتحاسبو مع شي ايكسبير كونطابل!

فاش كايكون الغرض من الخير ماشي هوا الخير بحد ذاتو ! ماشي هوا تشوف المنفعة و الاثر ديالو ! نورمال تلوح الفلوس لحميد القشلاوي و لمول القبية و لمولات التكشيطة و تأتامنهم يديرو الخير فبلاصتك بار بروكيراصيو !

حيت الناس لي كايبغيو يديرو الخير بصح كايبداو بجنابهم بعدا غايلقاو شي فرع فالعائلة مقودة عليه ! و لا يمشيو للخيريات و الجمعيات و الدواور فالقرى ودور الطالبة و الاحياء الجامعية لي الدراري ماكايلقاو فيها ماياكلو و الطالبات كايبيعو لحمهم ببانيني كفتة و عصير لافوكا !

ماشي آجي يامي نوريك دار خوالي !

موضوعات أخرى

21/08/2019 13:00

بسباب لمجرد. ابتسام لشگر ماخلاتش فسميرة سعيد: من بعد ليلى حديوي ها مرا اخرى مشاركة بدون عقد فثقافة الاغتصاب والعنف الذكوري