كود الرباط //

أغلب الناس للي متبعين قصة عبد الإله مول الحوث د مراكش استغربو مللي سمعو بللي شي حد لاباس عليه، وقال عليه عبد الإله بللي هو “رجل وطني”، صافط ليه كاميو د السردين فابور وقال ليه يبيعو ب 10 دريال للفقراء والمساكين.

الناس ستغربو وبداو كيتساءلو وكيشكو بللي هاد القصص ديال البحر فمراكش راها فيها شي إن ماشي هي هاديك.
الناس بدات كتسول:

شكون هاد “الرجل الوطني” للي عطا كاميو ديال الحوث لعبد الإله مول الحوث ديال مراكش وقال ليه يبيعو ب 10 د ريال للكيلو؟ وشنا هو الغرض ديالو من نشر هاد الشي فالوقت للي أسواق السمك فالمغرب كتعيش فوضى عارمة؟ وعلاش مشات زكية الدريوش، كاتبة الدولة المكلفة بالصيد البحري، قامت بزيارة مستعجلة لسوق الجملة للأسماك ديال الدار البيضاء وما مشاتش لمراكش ؟

“كود” دارت تحريات ديالها وجمعات معطيات أولية من مصادر مختلفة ف قطاع الصيد البحري ووقفات على أمور
غريبة وخطيرة جدا.

“كود” بحتات على هوية هاد الملياردير للي عطا كاميو ديال الحوث فابور لعبد الإله مول الحوث، ووصل ليها من مصادر من قطاع الصيد البحري أن هاد الملياردير هو واحد من بارونات الصيد فأعالي البحار ورئيس غرفة مهنية وبرلماني وقيادي فحزب التجمع الوطني للأحرار. هاد الشخص تقلق علاش السلطات دارت مؤخرا تفتيش فالعديد من المصانع ديالو فمدن مختلفة من الداخلة والعيون وبوجدور وأكادير وأسفي والدار البيضاء، ولقاو عندو خروقات عديدة وخطيرة فهاد المصانع وسدو ليه البعض منها.
على هاد القبال، السيد تقلق وشعل وبدا كيتاصل بالمسؤولين فالإدارة الترابية وبالوزراء والقياديين فالحزب ديالو، لكن الجميع قالو ليه الوقت مزيرة وما كاين غير القانون للي غادي يتطبق. السيد زاد جعر، ومللي فجر عبد الإله مول الحوث فمركش قصة بيع كيلو ديال السردين للفقراء ب 5 دراهم، السيد قرر يزيد ف العافية ويشعلها أكثر وتاصل بعبد الإله وصافط ليه كاميو من بوجدور فابور وقاليه بيعو ب 10 دريال للكيلو.

هاد الملايري، كان صديق الوزيرة الدرويش قبل ما ينقلب عليها وينوض صداع بيناتهم، هو كمال صبري مستشار برلماني.

المراكشي عبد الاله النشيط ف تكتوك وللي ديما طالق لايفات، معارفش بللي راه هو غا سريدينة داخلة فاللعب الكبير مع الحيثان والقروش الكبار ديال الصيد فأعالي البحار للي باغين يسيطرو على الصيد الساحلي التقليدي كيما سيطرو على الصيد فأعالي البحار باش احتاكرو البحر والبر والجو.
كاتبة الدولة فالصيد البحري، زكية الدريوش، للي محاصرة من مافيا الفساد فأسواق الأسماك، ناضت دارت زيارة لسوق الجملة للأسماك فالدار البيضاء، وبقات كتعجب من حجم الفساد والتلاعبات والرعب المنتشر فهاد السوق. لدرجة دوروها لبارح فواحد مشهد غريب، وسط فوضى.

هاد الوزيرة وصلوها معطيات خطيرة عن إستعمال أحد مصانع الثلج الموجود فقلب السوق لمواد خطيرة جدا، كتقول بعض المصادر أنه غاز الأمونياك، وللي هو ممنوع الاستعمال ديالو فأماكن كيجيو ليه يوميا الآلاف من البشر.

والسؤال هو: واش المليارديرات ديال والريع والرخص ديال تعالي البحار، وللي للأسف منهم للي كينتاميو لحزب الوزيرة الدرويش، تغولو بزاف لدرجة بداو فالصابوطاج ديال الحكومة ويضربوها من تحت الدف.
“كود” غا تبقى تابعة الموضوع. ف مقالات لاحقة.
يشار بلي حاولت كود تاصل بهاد الملايري مول البواخر ديال الصيد، إلا ان هاتف ظل يرن دون جواب. وخلت ليه مساج فواتساب.