كود هناء ابو علي ////
ما بقاش امام رئيس الحكومة عبد الاله بنكيران حلول كثيرة بخصوص تشكيل حكومتو. البارح سد عزيز اخنوش رئيس التجمع الوطني للاحرار الباب باش جدد التشبث بحزب الاتحاد الاشتراكي للمشاركة فالحكومة. حزب تلات بيه اليام وولى من الذل يقبل حزب كان كيسميه قادتو هادي مدة ب”الحزب الاداري”. لشكر اللي دمر حزبو وجاب الاعيان ويالله حصل على 20 مقعد وخدا في اهانة لجميع المصوتين المغاربة رئاسة مجلس النواب باغي بزز الحكومة. حزبو اللي تحالف مع البوليساريو باش اتحادية توصل رئيسة للمراة الاشتراكية كيعطي دروس دابا فالعلاقات الخارجية.
هاد البلوكاج وفق مصدر “كود” غادي يخلي رئيس الحكومة يدير اللي كان صرح به. يتسنى يدخل الملك محمد السادس للمغرب بعد جولة طولات بزاف فافريقيا ويطلب لقاء معاه باش يقول ليه فين وصل هاد الشي. طبعا غاليا غادي يكون التقرير على تفاصيل هاد المفاوضات الغريبة العجيبة اللي تخلى احزاب عاقبها المغاربة تتحكم فتشكيل حكومة.
من نهار بدا تشكيل الحكومة وكلشي عبثي والنتيجة غالبا ما تكون عبثية
