كود سعاد زرا الرباط ////

مهرجان “موازين” غادي يبدا غدا. مهرجان كبير كيقدم خدمات كبيرة للبلاد. برمجة عالمية. واخا شركة العلاقات العامة خاصها تمشي فحالها العام الجاي ويجيبو اللي فيدهم وتسالي هاد المرحلة ديال التخربيق. المهم حدث كبير. فيه نجوم كبار من امريكا وافريقيا واوربا وعربيان. لكن كاين حدث صادم وقع فمدينة فاس مؤخرا كيضر بمصداقية المغرب. كيضر بهاد المهرجان. شي جمعية قدمات شكاية ضد 3 روابا والقاضي حكم عليهم بالسجن. اييه حكم على جوج خوت بالحبس وزادهم ثالث. مول “شر كبي أتاي” و”شر كبي هواي” و”عمو راه ولدتي الزين”.

اخر الاحكام بالسجن كانت ابتدائيا هادي 15 يوم ضد “عمو راك ولدتي الزين” وضربو الحكم بسنتين سجنا وفهاد الحكم الغريب بحال للي سبقوه طلبو منو يحذف الاغنية من كاع الوسائط الإلكترونية المستعملة.

اغاني الراب هادي كيقول القاضي فيها تحريض على “ارتكاب جنح، التحريض على الإجهاض، الإخلال العلني بالحياء، التحريض على الدعارة، تسهيل البغاء على القاصر دون سن الثامنة عشر”. واش هاد القاضي ما كيفرقش بين الابداع وبين الواقع.

هادي ضربة لحرية الابداع. ضرب للحرية بشكل عام.

هشام  هشام عبقري، مدير مديرية الفنون فوزارة الثقافة، فبرنامج مع “الرمضاني” على “دوزيم” هدر علي ما سماه “اشكال في تأويل القانون في متابعة “الروابا” قضائيا.

وهدر على الموضوع وقال باللي “كانو حالات توبعوا.. مسألة تأويل . والاشكال في القانون هو ملي كتعطي سلطة تقديرية غير مضبوطة قانونيا..“.  وأضاف عبقري بلي كاين اشكال التأويل، مشيرا بلي كانوا حالات في نفس السياق لم تتم متابعتهم. حتى التموقع الجغرافي وبعض المناطق صغار كيكون تخوف، وبلي المدن الكبيرة لي فيها هامش حرية كبير كيكون التعامل مع هاد الحالات.  وشدد عبقري بلي النص المؤسس للدولة هو الدستور، تصدير الدستور يؤكد على التعددية الثقافية. الدستور متعدد.

دابا هشام عبقري الخبير فالراب المغربي قبل ما يولي مدير مديرية الفنون٬ كيقول خطاب ضد احكام قضاة ففاس. فاس اللي خاصها تكون سابقة عصرها ماشي تصدر محاكمها احكام ما عندها علاقة بمغرب موازين
دابا هادوك القضاة اللي حكمو ففاس وما بغاوش يعتابرو الاغاني ابداع٬ اش غاديين يديرو باش يسمعو اغاني نيكي ميناج. خاص سقراط اللي ساكن ففاس يترجم ليهم الكلمات بدارجتو.

اليوم خاص مهرجان موازين يكون مناسبة لحملة باش يطلقو فيها هاد الروابا. خاص الصحافة تسول نجوم المهرجان على موقفهم من هاد الاحكام. حشومة ما ياخدوش عفو قبل ما يبدا هاد الحدث وكنشوفو دعاة الكراهية والظلامية بحال الكتاني وصحابو كينشرو خطاب كيهدد حياة مغاربة وما تحكم عليهم ما تابعو. شفنا خطيب كفر كلشي وما هدر معاه حد. 3 روابا تشدو وتحاكمو وبالزربة.

مزيان نعرفو رأي نيكي ميناج فاعتقال هاد الروابا