احمد الطيب كود الرباط//

صحاب مقاطعون واللحايا المخبيين فمكاتب طلبة المعاهد ديال المهندسيين والمدارس العليا، دايرين حالة فالموسم الجامعي والدراسي لي داز وكيوجدو دبا للموسم الجديد، باعلان استمرار مقاطعة منتوجات شركات وطنية منهم تعاونية كوباك لي كولشي كيشهد بدورها الكبير فحماية عدد من الفلاحين والتعاونيات رغم الجفاف والوضع المائي المقلقل.

ولكن باش يتافقو عدد من مكاتب طلبة المعاهد على مقاطعة منتوجات شركات مغربية حيث فقط كانت دارت شراكات مع شركات اسرائيل، فراه الغباء هذا، وخاص يقاطعو حتى ماطيشا وكاع الخضر لي كيتم انتاجهم ببذور اسرائيلية وبأدوية اسرائيلية. الغباء معندوش حدود ولو يتم الاضراب بمصالح الشركات الوطنية.
هاد مداويخ المقاطعة محركينهم صحاب BDS فالمغرب، كيفرضو على مطاعم ومقاهي فالكليات باش تعاقد مع شركات معينة دون غيرها، وفين المنافسة وفين احترام العقود وو.. دبا شنو الفرق بين سنترال وجودة والرفيع، كلهم شركات خدامين فيها مغاربة، علاش ترفض هادي وتعاقد مع هاديك.
مكتب طلبة معهد الحسن الثاني للزراعة والبيطرة، قال قبل اسابيع بلي تم التخلص من الشركات الداعمة لاسرائيل، ولو في أدق تفاصيل الحياة الجامعية، بما في ذلك المنتجات الغذائية المستهلكة أثناء الوجبات المقدمة من طرف مطعم المعهد.
مكتب الطلبة قال تم “الاستغناء عن كل منتوجات الألبان التابعة لشركة “جودة” التي تنتمي لتعاونية كوباك، و”جبال” التي تنتمي بدورها لصافي حليب، والاستغناء عن المشروبات الغازية التابعة لشركة بيبسيكو أمثال: بيبسي، ميرندا، سفن آب”.
اليوم ناض مكتب طلبة المدرسة الوطنية للفلاحة حتى هوما علنو عن مقاطعة المنتوجات ديال شركات عندها علاقة مع اسرائيل.
كيفاش هادو كيفرضو شركات فالمطاعم ويحيدو شركات، هادو راه فاتو مجلس المنافسة، هادو دارو شرع يديهم فالقرار الاقتصادي الوطني لي كيخضع للمنافسة الحرة.