الوالي الزاز -كود- العيون ///

[email protected]

كشفات مصادر خاصة “گود”، أن محاولات كثيرة كتقودها جهات حكومية إسبانية في سبيل التدخل في ملف الشاب المختطف من طرف جبهة البوليساريو، سالم ماء العينين اسويد، بسباب الحرج للي وقعات فيه بحكم أن الشاب كيحمل الجنسية الإسبانية.

وأوضحت مصادر “گود”، أن جهات حكومية إسبانية لقات راسها ضروري انها تدخل على خط ملف الشاب المختطف من طرف قيادة جبهة البوليساريو، وهادشي خلاها ان تربط الإتصال بحكومة الباسك باش تدخل حتى هي فالملف، بحيث ان تدخل حكومة الباسك عندو معنى، أولا لأنه حامل للجنسية الإسبانية وعنوان الإقامة ديالو كاين فالباسك.

مصادر “گود” قالت أن الحكومة الإسبانية ما عندها اي تنسيق أو روابط مباشرة حاليا مع البوليساريو منذ تغير الموقف الإسباني من نزاع الصحراء ودعم حكومة مدريد لمبادرة الحكم الذاتي، بحيث كتقود دابا ضغوط على حكومة الباسك باش تدخل على خط الملف بحكم علاقاتها المباشرة مع البوليساريو ودعمها ليها وهادشي باش يتم إطلاق سراحو أو على الأقل توجه ليه البوليساريو تهم ويتحاكم والتخريجة هي هادي باش يتم إطلاق سراحو.

نفس المصادر أكدات بلي إسبانيا عندها مسؤولية فالقضية بسباب الجنسية لي عند المختطف سالم ماء العينين اسويد، والحل لي عندها هو أنها ضغط على حكومة الباسك من خلف الكواليس باش تسثمر علاقات الأخيرة مع البوليساريو ودير بصمة فالملف، وهاد الوقت هو أحسن توقيت بعدما استقبل رئيس حكومة الباسك ممثل البوليساريو الجديد البارح.