كود كازا//

بعد الاستقلال والبام، يبدو أن عدوى الصراع وصلات لحزب التجمع الوطني للأحرار، وخلقات خلاف كبير وخاصة بين البرلمانيين ووزراء الحزب.

مصادر داخل الأحرار، افادت ل”گود” بلي رئيس فريق الأحرار بمجلس النواب محمد غياث متهم بالانقلاب على رئيس المجلس رشيد الطالبي العلمي بعد تنظيم لقاء بالدار البيضاء تقال فيه كلام فحق الحكومة والوزراء ديال الحمامة، وقلال البرلمانيين فهاد اللقاء للي دافعو على الحكومة.

لكن مصدر مقرب من غياث نفى هادشي وقال ل”گود” بلي مكاينش خلافات ولا والو، ورئيس الحكومة هو يقود المفاوضات والترتيبات مع الحلفاء ديال الاغلبية.

وحسب مصادر “گود” فإن قيادة الأحرار تتوجس من اتصالات من قبل قيادة البام ببرلمانيين من الاحرار وعلى رأسهم رئيس الفريق محمد غياث باش ينقالبو على رشيد الطالبي العلمي في التصويت لانتخاب رئيس جديد للمجلس في دورة أبريل المقبلة.

مصدر قيادي قال ل”گود” بلي قيادة الاحرار معندهاش علاش تتوجس من اتصالات البام، مؤكدا بلي كل حزب عندو طريقتو فالاشتغال والاستقطابات عندها مجالها وكيفاش يتم تدبيرها.

ورغم أن الطالبي العلمي لازال يحتفظ بحظوظ قوية لإعادة انتخابه على رأس مجلس النواب، إلا أن تعتر المفاوضات حول تعديل النظام الداخلي للمجلس وحول مدونة للسلوك والاخلاقيات كتجعل مهمة الطالبي العلمي صعبة.

وراج قبل ايام بلي القيادي البام صلاح الدين ابو الغالي، عينو على رئاسة مجلس النواب، وهو ما حاول قادة البام نفيه.

من جهتها، حسابات التعديل الحكومي المرتقب غادية تعقد الوضع أكثر لأن البام والاستقلال كيمارسو ضغوطات قوية على رئيس الحكومة باش يطفيو العافية للي شاعلة فأحزابهم بسبب الصراع على المناصب الحكومية.

هاد الشي للي غضب قيادة الأحرار بزاف من وتم تكليف وزير العلاقات مع البرلمان مصطفى بايتاس البارح باش يوجه انتقادات لرئيس الفريقين بخصوص التواصل والحصيلة والتعامل مع باقي الشركاء، وطالبهم بعقد لقاءات في عدة جهة وتحريك العمل البرلماني .

للي ما عارفش بايتاس هو أن الاستعدادات لانتخابات 2026 بدات، وأن العديد من البرلمانيين ديال الأحرار بداو فاتصالات سرية مع قيادة البام الجديدة لضمان مواقعهم في التشكيلة السياسية المقبلة.

مصدر متبع لهاد الحروب الداخلية قال ل”گود” يالكل الآن كيراهن على ذكاء الطالبي العلمي باش يرجع الاستقرار لمجلس النواب، وهاد علاش قرر باش يعقد اجتماع حاسم لمكتب المجلس يوم الخميس الجاي بموازاة مع انعقاد مجلس الحكومة”.

مصادر متطابقة قالت بللي عزيز أخنوش غايدير إجتماع مع الفريقين البرلمانيين قبل افتتاح الدورة الربيعية باش يأكد الدعم ديالو لرشيد الطالبي العلمي وباش يدفع بوجوه جديدة للتعيين في مناصب فالبرلمان والحكومة والمؤسسات والهيآت الدستورية.