كود هناء ابو علي ///

ليلة السبت 5 فبراير 2022 مع التسعود و47 دقيقة دالليل خرج بيان للديوان الملكي فيه ان سيدنا اتصل بوالد ووالدة الطفل ريان٬ 5 سنين٬ وعزاهم. الطفل كان طاح فبير 5 ايام قبل ودار كلشي باش يتجبد ووصلات ليه فرق الانقاد لكن خرج ميت.

طبعا الحادثة تعرفات فالعالم كولو. رجع الطفل رايان ايقونة. خدا بعد اسطوري. عطا صورة مشرقة غير مسبوقة على المغرب فظرف قياسي.

فهاد العملية ديال الانقاذ تبعها الملايين وحضر للقرية ديال الطفل الاف لمغاربة. فبيان الديوان الملكي نعرفو ان الملك كان متبع هاد العملية من الاول حتى اللخر “وقد أكد جلالته، أعزه الله، بأنه كان يتابع عن كثب، تطورات هذا الحادث المأساوي، حيث أصدر تعليماته السامية لكل السلطات المعنية، قصد اتخاذ الإجراءات اللازمة، وبذل أقصى الجهود لإنقاذ حياة الفقيد، إلا أن إرادة الله تعالى شاءت أن يلبي داعي ربه راضيا مرضيا”

وحسب ما علمته “كود” فقد اعطى تعليماتو باش ما تمشي لا حكومة لا غيرها لتماك. تبقى السلطات المحلية ممثلة فوالي جهة طنجة تطوان الحسيمة مهيدية مشرفة على عملية الانقاد.

فبيان الديوان الملكي كذلك اشادة بعمل الفعاليات الجمعوية اللي عاونات السلطات اوالقوات العمومية. اشادة بالتضامن القوي. حسب ما علمته “كود” كان اتجاه باش يتم ابعاد كاع هادوك اللي كانو تماك وعددهم بالالاف من القرية واخراجهم منها٬ وقد اعطيت تعليمات باش ما يجريو علي حد. ما يقربو لحد. يديرو حزام باش تستمر عملية الانقاد وصافي.

يعني سيدنا كان متبع خطوة بخطوة طيلة 5 ايام هاد العملية المعقدة لانقاذ الطفل رايان. هاد الشي علاش خبر الوفاة خرج مع تقديم رئيس الدولة التعازي للعائلة عبر الهاتف