هناء ابو علي ////

فعيد الشباب ديال 2015 عطا محمد السادس وسام المكافأة الوطنية من درجة فارس لسعد لمجرد. كان تشهر باغنية “انتي باغية واحد”. خدا وسام المكافأة. بعد عام وشي 3 شهور غادي يمشي هاد اللي خدا وسام “فارس” لفرانسا وغادي يغتاصب لورا وعمرها 20 عام فغرفة 714 بفندق ماريوت بباريس. الجمعة اللي فاتت كان الحكم عليه ب6 سنين. 

المحكمة وبعد 7 سوايع ديال المداولات قالت باللي “مقتانعة” باللي الاغتصاب وقع. وزادت باللي اللي قالتو لورا ثابت ودقيق. 

ف6 نونبر اي عيد المسيرة الخضرا ف2018 خدات مغنية  اسمها دنيا باطما وسام ملكي بدرجة ضابط وخدات شي وسام اخر. باطما توصلات بتهنئة من الملك شخصيا وخرجات فرحانة كتهدر عليها. مزيان. قالت الملك كيشجع الشباب كتقصد راسها طبعا. لكن اش من شباب واش اللي غادي يتورط ف”حمزة مون بيبي” وغادي يتحكم عليه ابتدائيا ب6 اشهر وتطلع لعام فالاستثئناف. واش فهاد القضية؟ “نشر نشر صورا ومعطيات شخصية” لاشخاص وفنانين و”المشاركة في الدخول إلى نظام المعالجة الآلية للمعطيات عن طريق الاحتيال، والمشاركة عمدا في عرقلة سير هذا النظام وإحداث اضطراب فيه وتغيير طريقة معالجته، وبث وتوزيع أقوال أشخاص وصورهم دون موافقتهم عن طريق الأنظمة المعلوماتية، وبث وقائع كاذبة قصد المساس بالحياة الخاصة للأشخاص قصد التشهير بهم والمشاركة في ذلك”.

الخطير فعصابة مون بيبي ان باطما ما كانت بوحدها بل معاها اختها اسمها ابتسام. هادي دوزات الحبس معاها شي مصممة اسمها عائشة عياش وشي وحدة مؤثرة قال ليك اسمها صوفيا شكيري. دنيا باطما اللي محكومة استئنافيا مازال. كتسنى محكمة النقض وهاد الشي يقدر يستمر سنوات.

قبل ما تاخد الوسام تقدر تكون تستحق وسام. لكن بعد هاد الشي اللي تحاكمات بيه ودانت بيه راه خاصو يتسحب ليها.

ايلي لاحظتو كانت باطما اول من دعم سعد لمجرد بعد الحكم عليه. تريكة وحدة. لا هي لا سعد لمجرد خاصهم يحتافظو بهاد الوسام الملكي. 

طبعا هاد الشي ممكن. سبق للمحامي بهيئة تطوان نوفل البعمري وضح هاد الشي فحوار سابق مع اسبوعية “الايام”. 

هاد المحامي ذكر باللي “بالعودة للظهير الشريف رقم 218.00.1 الصادر سنة 2005 المتعلق بالأوسمة الملكية، فإنه نظم عملية سحب الوسام الملكي إذ أعطى لرئيس ديوان الأوسمة إمكانية إصدار عقوبات لمن حكم عليه بعقوبات جنحية أو جنائية، وارتكب ما يخل بالشرف، وهي عقوبات تتوزع بين “التوبيخ والتوقيف والحذف” حسب المادة 83 منه، وذلك بعد موافقة مجلس الأوسمة، فيبلغ القرار لمن اتخذ القرار في حقه وإلى السلطات، فيتم السحب من سجلات ديوان الأوسمة،بالتالي سحبها نهائيا ممن سبق أن حصل على الوسام”.
هاد الشي ينطابق علي سعد لمجرد ودنيا باطما. بجوجهم محكوم عليهم بعقوبات جنجية او جنائية. هادو خاصهم سحب الوسام. الاغتصاب والانضمام فما يشبه عصابة لابتزاز اشخاص وفنانين راه اخطر بكثير.