الرئيسية > آش واقع > خاص.المالكي باقي فبلاصتو رئيسا لمجلس النواب..زعيم حزبي لـ”كود”: مكاينش مرشح منافس ويستمر العبث..والداودي لـ”كود”: هو من الأغلبية دبا
10/03/2019 15:30 آش واقع

خاص.المالكي باقي فبلاصتو رئيسا لمجلس النواب..زعيم حزبي لـ”كود”: مكاينش مرشح منافس ويستمر العبث..والداودي لـ”كود”: هو من الأغلبية دبا

خاص.المالكي باقي فبلاصتو رئيسا لمجلس النواب..زعيم حزبي لـ”كود”: مكاينش مرشح منافس ويستمر العبث..والداودي لـ”كود”: هو من الأغلبية دبا

هشام أعناجي – كود مكتب الرباط//

aanajigoud91@gmail.com

قال زعيم حزبي من الأغلبية الحكومية إن “الحبيب المالكي، رئيس مجلس النواب (ثالث منصب على هرم الدولة بعد رئيسي الدولة والحكومة)، باقي فبلاصتو مغاديش يكون تغيير عليه ومكاينش مرشح بديل”، مضيفا :”حزبي الاستقلال والبام مغاديش يقدمو مرشح والبيجيدي مغلوب على أمره”.

من جانبخ أكد قيادي في حزب الاستقلال، فضل عدم ذكر اسمه، في تصريح لـ”كود” أن “معركة اعادة انتخاب هياكل مجلس النواب محسومة وأن الفريق الاستقلالي لن يصوت على المالكي مادام جزء من المعارضة والأغلبية معه”، مضيفا :” مكاينش مرشح منافس مدام البام غايصوتو عليه وحنا في الاستقلال غانساحبو من ديك المسرحية”.

وأوضح الزعيم الاستقلالي لـ”كود” :” ويستمر العبث إلى حين، ولي فراسي مكاينش مرشح منافس وحنا مغاديش نقدمو مادام الحساب واضح والمعارضة ديال البام غايمشيو مع المالكي شنو يبقا عدديا بحال مسرحية انتخاب هياكل المستشارين”.

وسبق لـ”كود” أن سألت لحسن الداودي، القيادي في حزب العدالة والتنمية، عن “امكانية تصويت فريق حزبه على الحبيب المالكي في انتخابات منتصف الولاية التشريعية خلال شهر ابريل”، حيث أجاب الوزير في حكومة العثماني بالقول :” هذا قرار ديال الحزب والى كان توافق راه هو دبا من الأغلبية والمعطيات تغيرت” وذلك خلال حوار سابق مع “كود”.

وعلمت “كود” من مصادر مطلعة أن الصراعات الخفية فالكواليس ديال اعادة انتخاب هياكل مجلس النواب ، لي غايكون فشهر ابريل المقبل، بدات حيث كولشي كيراقب شكون غاتجي فيه الدقة، خصوصا في ظل الحديث عن انشقاقات وسط الفرق البرلمانية وظهور صراعات بين أعضائها والصراعات على المهام والتعويضات السخية فالمجلس.

الاتحاد الاشتراكي.. الضربة جايا

“كود” سولات مصادر برلمانية على ابرز التغييرات لي غاتكون فالهيكلة الجديدة المنتظرة، طبعا كاين لي كيقول بلي الحبيب المالكي غايبقا ما حد الاتحاد الاشتراكي باقي فالحكومة وما حد ميكان تا مرشح، لكن مع تغييرات فالفريق الاشتراكي خصوصا في ظل صراعات داخل المكتب السياسي والغضبة الشهيرة ديال ادريس لشكر على امام شقران رئيس الفريق الحالي.

طبعا شقران من المؤهلين يفقدو المنصب، موراه تغييرات فممثلي الفريق الاشتراكي داخل المكتب.

ماشي غير هادشي تغييرات كثيرة غاتوقع فالمهام واللجان الموضوعاتية.

العدالة والتنمية.. ماء العينين والعماري

اما حزب العدالة والتنمية لي عندو النائب الاول فمكتب المجلس عبد العزيز العماري، تا هو موحال واش يبقا حيثاش عندو بزاف مهام ومبقاش باغي يزيد عليه الثقل كيبغي يتفرغ لمدينة الدار البيضاء، ولي هي من كبريات المدن ولي فيها مشاكل كثيرة بزاف واش يقد غير عليها بوحدها.

طبعا ماء العينين، البرلمانية المزعجة كما يفضل الكثيرون وصفها، بعد قصة باريس ونزع الفولار الاسلامي، هناك اصوات داخل الفريق وداخل قيادة البييجيدي بغات تصفي المرأة الوحيدة فالبيجيدي، لي عندها جرأة قوية فعدد من المواضيع ولي غادي تبوح مزال بمواقف غادير دير نقاش كبير وسط العدالة والتنمية.

تصفية ماء العينين غالبا غايتنقل لمكتب مجلس النواب.

انقسام التجمع الدستوري.. فرصة لطرد جودار من المكتب

التوجه لي اعلن عنه حزب التجمع الوطني للأحرار، فالمجلس الوطني الأخير، وقبل منو “كود” كتبات الخبار ديال الفراق بين هاد جوج فرق تجمعو فظروف البلوكاج لغاية ازاحة بنكيران من رئاسة الحكومة، دبا غايتفرقو والضحية الأولى ديال الفراق هو رجل الأعمال محمد جودار القيادي فالاتحاد الدستوري لي ولى مهدد بفقدان منصب النائب الثالث.

أما المهام لي كاين المجلس تا هي غاينوض فيها صداع كبير، خصوصا وقع تشنج مؤخرا بين اعضاء الفريق الدستوري وفريق الاحرار حول عدد من المهام، يعني روينة ثاني غاتنوض.

وحسب المادة 28 من القانون التنظيمي لمجلس النواب، فإنه تعقد جلسة عمومية خاصة لانتخاب أعضاء مكتب المجلس على أساس التمثيل النسبي لكل فريق، وذلك في السنة  الثالثة النيابية عند دورة أبريل لما تبقى من الفترة المذكورة.

كما أنه، وفقا للقانون ذاته، لا يمكن الجمع بين العضوية في المكتب وبين رئاسة لجنة من لجن المجلس الدائمة أو رئاسة فريق نيابي أو رئاسة لجنة مراقبة صرف ميزانية المجلس أو العضوية في مكتب إحدى اللجان.

هنا القانون كيفتح باب الصراعات على أشده بين الزعامات الحزبية، على شكون لي يشد رئاسة الفريق ولي يشد ادارة الفريق ولي يشد رئاسة اللجن ناهيك عن النواب وما الى ذلك.

لجنة المالية.. “الكابوس” لي مرون الأغلبية

لجنة المالية والتنمية الاقتصادية، لي كيترأسها عبد الله بوانو، لجنة غير عادية خلقات الحدث طوال هاد 3 سنين، طبعا بدا صداع بزاف فالمهمة الاستطلاعية حول المحروقات والجدل الكبير لي ناض ولي كان مقدمة لحرب سياسية كبيرة بين الاحرار والبيجيدي، طبعا هاد الحرب حسب مصادر برلمانية، غايتنقل فانتخاب الهياكل والسؤال: واش غايبقا بوانو رئيس ديالها ولا غايبدلو البيحيدي ولا الاحرار غايدير صفقة مع العثماني باش ياخد رئاسة اللجنة مقابل لجن اخرى او تمرير قرارات اقتصادية معينة؟ كلشي مطروح من هنا تال ابريل.

الأحرار.. صفيح ساخن

هاد الصداعات لي داخل الفرق مخطات تا واحد، كاين خلافات وصراعات داخل الحمامة، وكاين تيار باغي يبدل توفيق كميل من زعامة الفريق البرلماني.

القصة مشوقة غانرجعو ليها فمقالات مقبلة.

موضوعات أخرى

26/06/2019 11:51

تبريرات غبية للعرايشي على حرمان لمغاربة من الكان. قبلو دار بوطبسيل أزمة باش علن على الثمن واكتاشفو الدزايريين باللي شراو الحقوق غالية بزاف بزاف

26/06/2019 10:00

حْنا و”الكان”. الحلقة 3: المغرب يواصل غيابه عن دورتي غانا 1963 وتونس 1965 في فترة عرفت خلافات بين الدول العربية حول القضية الفلسطينية