هشام اعناجي – كود أكادير //

كيف نشرات “گود” سابقا، كلمة “ارحل” فوجه عزيز أخنوش لي حضر لمهرجان “تيميتار” لبارح بصفتو رئيس المجلس البلدي لمدينة أكادير، غير كذوب وفايك نيوز.

بلعكس، الناس عبرات بالفرحة لحضور اخنوش للمهرجان، حسب فيديوهات توصلت بها “گود”، إذ تجاوز عدد الحاضرين في المنصة أزيد من 110 ألف شخص.

اللي تروج هو أن كلمة “ارحل اخنوش” ترفعات فاش كان الفنان العالمي لاغتيست كيغني، وفنفس الوقت كان اخنوش وسط الحضور، لكن الحقيقة عكس كذلك.

“گود” تلاقات بالفنان لاغتيست، وسولاتو واش بصح ترفع شعار “ارحل اخنوش”؟ وجاوب بلي فاش كان فالمنصة ماسمعش گاع هاد الكلمة.

لاغتيست وضح لـ”گود” بلي الهضرة لي دارت بخصوص ارحل ماشي عليه وإنما يمكن على شي وزير.

الفنان لاغتيست رفض يعطي تصريح أو تعليق فالموضوع، واكتفى بهادشي لي قالينا.

وحسب ناس حضرو إلى جانب هاد الوفد، ومنهم صحافيين ومواطنين، لي وقع هو العكس، الجمهور تدافع باش يتصورو مع اخنوش.
اضافة الى هادشي كاين فيديو عند “كود” ماشي مركب ولا تعاود ليه مونطاج، فيديو عفوي فيه ناس بغات تصور مع اخنوش لي هو رئيس بلدية أكادير.

من غير هادشي، جولة صغيرة فأكادير وحديث مع التجار وصحاب الطاكسيات وعمال ومستخدمين، كولشي كيهضر على الثورة الاقتصادية لي كتعرف أكادير، وإصلاحات الكبيرة وكولشي.

شهادات مواطنين خداتها “گود” لبارح بمناسبة افتتاح المهرجان، عجبهم الحال وفرحانين.

‌