كود كازا ///

ولد الطيب الفاسي الفهري اللي سميتو ابراهيم هان الصحافة والصحافيين. طبعا هان هادوك اللي كيمشيو يغطيو نشاطو “ميدايز”. هاد الاهانة بانت فالشروط اللي حطها هاد اللي ما قبلاتو حتى مدرسة كبيرة ففرانسا لانو كسول وتحول لمكلف بجماعة ضغط وكلشي كيدعمو.

قال وبالعربية حقاش كيحتاقر لغة بلادو واخا فرنسيتو ضعيفة بحال مستواه٬ باللي ايلى بغى شي حد ياخد الاعتماد فالنسخة القادمة من “ميدايز” اللي كيدار فطنجة كل عام٬ خاصو “فوطو كوبي من لاكارط ناسيونال ليكاليزي يا سيدي وفوطوكوبي من بطاقة الصحافة ديال المجلس الوطني للصحافة عام 2023 ليگاليزي. اييه

هادي ممكن تقبل واخا هاديك ليگاليزي مهينة. الغريب هو انو يطلب فوطوكوبي ديال السجل التجاري للشركة الناشرة ليگاليزي. تصورو وزارة الاتصال باش تبغي تطلب الدعم ما كتطلبش وثائق بحال هادي وولد الطيب الفاسي الفهري كيطلبهم. لقصر فانشطتو اللي كيحضرو ليها الصحافة ما عمرهم طلبو هاد الشي.
تسناو تعرفو الوثائق الاخرى. طلب يا سادة أوردر دو ميسيون ل”ميدايز” موقعة من قبل مدير النشر ووثيقة من الاو جي دي للصحافة المكتوبة ووثيقة ليگاليزي من “اليكسا” للصحافة الرقمية. حقاش المنظمين اغبياء بحالهم بحال مديرهم٬ ما فراسهم ان هاد اليكسا ما بقاتش.

وطلب “URL ديال الموقع وترسل كاع اللي كتبتي على الحدث من 2019 الى 2022. خاصك تكون تشكر هاداك ابراهيم طبعا. هادي نساها ما كتبهاش.

طبعا مستعدين ف”كود” نرسلو هاد الشي كولو باحتقارو للصحافة وبغرابتو ايلى كشف ليها باطرون ميدايز” ميزانية هاد الحدث. شكون كيعطيه لفلوس كلشي باسمو وصفتو. طبعا ميزانية هاد النشاط من 2019 حتى 2022. غير هاد الشرط بوحدو

ايلى رفض راه اي صحافي حضر لنشاطو هان راسو ماشي الصحافيين. دل راسو ماشي القطاع.