محمد سقراط-كود///

المخالفات والغرامات الهدف ديالها هو الردع، وتخلي الواحد يفكر كثر من مرة الى بغى يخرق القانون، في دول العالم المتحضر كتلقى عقوبات رادعة حقيقية، مثلا في ماليزيا الى كميتي وسط وسائل النقل العمومية تقدر توصل العقوبة حتى لعامين ديال الحبس، في سينغافورة خلاص ممنوع تاكل أو تشرب في وسائل النقل العمومية وممنوع تبزق في الزنقة، أما الى بلتي في الزنقة كتوصل العقوبة حتى لتلت شهور ديال الحبس أو غرامة أو بجوج، كذلك في بلدان كثيرة من العالم المتحضر، غاهو بعض الدول دايرة الغرامات تتماشى مع الثروة المواطن، مثلا واحد عندو فيات أونو شاريها بمليون وهو خدام بالسميك، الى جاتو الغرامة بربعمية درهم راه بالنسبة ليه جزء كبير من الدخل ديالو وطبعا غادي تكون رادعة وتضرو في جيبو، وتخليه يحتارم القانون بز منو، ولكن واحد عندو رويس رويس منصوري بربعمية مليون أو كثر، فاش جاتو ربعمية درهم غرامة راه والو نهائيا، كتلقى لوطوروط والرادار باين وواضح وبنادم عافط كاع ممسوق نهائيا.

في 2002 في دولة فلندا، واحد من الملايرية ديال نوكيا جاتو غرامة فايتة مية ألف أورو، أي فايتة مية مليون مغربية، لأنه تجاوز السرعة المسموحة وهي خمسين وهو وصل لخمسة وسبعين بالموطور، تم حساب المخالفة بناءا على التصريح الضريبي، كاين حالات خرى جاتهم خمسين مليون مغربية وكاين حالات عديدة في سويسرا وألمانيا وإسكندنافيا عموما، لي كيحسبو الغرامة على المخالفة بأيام العمل، مثلا كاين غرامة ديال خمسة أيام عمل، كيحسبو شحال ويسيفطو ليك للدار الغرامة، بالنسبة ليا هادي هي العدالة الحقيقية وهذا هو الردع، هنا في المغرب يوميا كنشوفو حديثي النعمة كينزلوا معفرين من الطوموبيلات، وكيخلصوا مخالفة لي هي بسيطة بالنسبة ليهم ويزيدو، حتى جزء من التنية ديال التذمر مكيبانش على وجههم، بينما ميلياردير نوكيا فاش جاتو مية مليون غرامة كتب عليها بوسط في الأنترنيت وتشكى وتغبن، حيت بصح ضراتو في جيبو وهذا هو الهدف أصلا من الغرامة.

السياقة في المغرب حاليا فوضوية معندها لا ساس لا راس، بنادم مكيحتارمش حتى أبجديات الصوكان، ويمشي غير بين الخطوط كتجيه صعيبة، كتلقى واحد غادي في لوطوروط وسط الطريق علما أنها جوج ممرات، بلا منهدرو على الأسبقية في الرومبوانات، والضو الأحمر لي مكيبقاش يتحتارم بالليل وحتى بنهار الى مكانش بوليسي واقف، كتلقى بنادم كيصوك هركاوي من نهار شد البيرمي ويالله مخلص مخالفة أو جوج من بين مئات المرات لي خرق فيها القانون بشكل يومي، هاعلاش خاص غرامات رادعة وخاص نظام فعال لظبطها وإستخلاصها، راه مايمكنش تدير بوليسي لكل مواطن يبقى حاضيه يزمم ليه الحسنات والسيئات، ولكن نظام ديال الكاميرات متطور راه ممكن، راه كاين دول صغيرة كتدخل مليار دولار غير مخالفات السير، ووطبعا من غير المداخيل كتلقى حوادث السير أقل وعدة فوائد أخرى لتطبيق القانون.