كود هناء ابو علي ////

البوتوبرز الياس المالكي مازال معتقل من . القرار دارو وكيل الملك فالجديدة من لثلاث اللي فات 29 اكتوبر 2024. دابا متابع ب”التحريض على الكراهية” و”التمييز بواسطة الوسايل الإلكترونية السمعية البصرية” و”بث وتوزيع ادعاءات ووقائع كاذبة وصورة شخص دون موافقته بغرض المساس بالحياة الخاصة للأشخاص” و”التشهير بهم والإخلال العلني بالحياء والسب والقذف واستهلاك المخدرات”. كان مشدود غير على ما قالو على “الشلوح” صدق فالحشيش. طبعا اللي قالو مدان وكينم علي جهل. المغربي راه فالجينات ديالو خليط. 

لكن هاد القضية كان ممكن فيها يتابع المالكي فحالة سراح. ما كنفهموش هاد وكلاء الملك علاش عندهم القاعدة هي المتابعة فحالة اعتقال والاستثناء هو المتابعة فحالة سراح.

كان وكيل ابتدائية عين السبع فكازا حكيم باش قرر يتابع الناشط الحقوقي فؤاد عبد المومني فحالة سراح. براڤو عليه. رغم التهم اللي متابع بها عبد المومني اصعب من اللي متابع فيها المالكي. فنهار الجمعة فاتح نونبر 2024 قرر وكيل ابتدائية كازا متابعة عبد المومني فحالة  سراح. وتقرر متابعتو ب”اهانة هيئة منظمة” و”نشر ادعاءات كاذبة” و”التبليغ عن جريمة خيالية يعلم عدم حدوثها”. هاد الشي على تعليق دارو علي تدوينة فالفايس. وهاد التهم راه اخطر بكثير من اللي متابع بها المالكي. 

خاص متابعة المالكي حتى هو فحالة سراح. 

كاينة قضية فشي شكل. هادا واحد اسمو رضى بن اوحود. معروف فالقنيطرة. ملايري. رجع راسو بنكة بلا خبار بنك المغرب. كيسلف وكياخد لانتيري. قبل ما يتابع الياس المالكي وهادي جوج سيمانات تشد هادا. من بعد قرر قاضي التحقيق متابعتو بتهمة تبييض الاموال. عرفتو شحال دخل للبنكة؟ 70 مليون درهم. هادا هو اللي كيسلف مول “كاسا ايما” فالرباط. القضاء خاصو يتابع حتى هادا اللي كيتعامل معاه. كان هربان ففرانسا قبل ما يحل معاه المشكل ويدخل. دابا هادا اللي كان باغي يترشح لرئاسة النادي القنيطري٬ دابا حر.

لحباسات عامرة بهادوك اللي فالحراسة النظرية واللي كيتسناو محاكمتهم. شوفو فرانسا. المحكمة ادانت داك المغني اللي سميتو سعد لمجرد ولكن ما تشدش. فاللول دوز الحبس ومن بعد خرج. هادا تحكم.

عليها خاص اللي تابع المالكي فحالة اعتقال يقبل طلب الدفاع ديالو يتابعو فحالة سراح. واش عندنا جوج انواع القضاء؟ االلا. اذن مادام المالكي عندو ضمانات كاملة باش يجي للمحاكمة علاش مازال محبوس. تابعوه فحالة سراح.