كود الرباط//
يبدو أن حزب التجمع الوطني للأحرار باغي فعلا يعاود ولاية حكومية ثانية بعد الانتخابات التشريعية ل 2026. هاد الشي كان أكدو رئيس مجلس النواب والقيادي فالحزب راشيد الطالبي العلمي في تجمع جهوي للمنتخبين التجمعيين تعقد فمدينة العيون وحضرو فيه أغلب قيادات الأحرار.
لكن الأمور تطورات بسرعة كبيرة بعدما قرر رئيس الحكومة عرض الحصيلة المرحلية لنصف الولاية الحكومية أمام البرلمان وللي تتوجات بتجديد الثقة في حكومة عزيز أخنوش أمام تشتت وضعف وتراجع كبير للمعارضة البرلمانية.
مصادر جد موثوقة أكدات ل “كود” بللي رئيس التجمع الوطني للأحرار عزيز أخنوش قرر يجمع أكثر من 10 آلاف منتخب من المنتخبين الجماعيين والاقليميين والجهويين والبرلمانيين يوم السبت 25 مايو الجاري بمدينة أكادير. هاد الإجتماع الجماهيري الكبير غا يكون الأول للي كيعقدو حزب سياسي فتاريخ المغرب وغا يكون نقطة إنطلاق حزب الحمامة لقيادة النصف الثاني من الولاية الحكومية الحالية في أفق الاستحقاقات الانتخابية المرتقبة ف 2026.
حسب ذات المصادر، هاد اللقاء مع المنتخبين كايجي بعد الانتقادات للي بداو كيطلقوها بعد قدماء الحزب، وخاصة الوجوه التجمعية القديمة والمستهلكة واللي جات كذلك من الترحال السياسي من أمثال محمد أوجار وبوسعيد وغيات والبكوري وصبري وسلامة وشباعتو ومورو وغيرهم.. للي بداو شبه مقتنعين بللي التعديل الحكومي المقبل ما غاديش يستافدو منو بعدما بداو كيشوفو بللي قطار الحزب غادي بسرعة أقوى وبقيادة كفاءات جديدة من شباب ونساء ومن مغاربة العالم، وهاد الشي بطبيعة الحال خالق نقاش كبير وتساؤلات حول موقف رئيس الحزب ورئيس الحكومة عزيز أخنوش من هاد التوجهات الجديدة للحزب.
هاد الأخير، وحسب ذات المصادر، قرر أنه يجمد اجتماعات المكتب السياسي للحزب، وبالمقابل قرر ينظم هاد اللقاء الكبير مع المنتخبين التجمعيين أولا باش يربط إتصال مباشر مع ممثلي المواطنات والمواطنين على الصعيد المحلي، وهاد الشي بطبيعة الحال عندو تأثير على القاعدة الانتخابية، وثانيا باش يقطع الطريق على أي محاولة لخلق شرخ داخل الحزب من قبل بعض المشوشين كيما كان وقع لرئيسي الحزب السابقين مصطفى المنصوري وصلاح الدين مزوار، وثالثا باش يتكلم بشكل صارم وحاسم مع المنتخبين حول الاختيارات المستقبلية للحزب والحكومة. هاد التوجيهات غا تصدر فكتاب غا يتوزع فهاد المناسبة باش يكون دليل للمنتخبين التجمعيين في العمل الجماعي التنموي.
نفس المصادر قالت بللي أخنوش ناوي يخرج العين الحمرا مع بعض المنتخبين وبعض الوجوه خاصة القديمة منها للي بغات ترجع لأساليب الضغط والابتزاز للي كانت كتدير فالماضي مع الرؤساء السابقين للحزب باش تحصل على مناصب وامتيازات، وهاد الشي كوللو باش يقطع الشك باليقين بالنسبة للتعديل الحكومي المرتقب والتعيينات فالمجالس والهيآت الدستورية بللي راه ما غادين يكونو فهاد التعيينات غير للي فعلا غادي يقدم قيمة مضافة للعمل الحكومي والمؤسسات العمومية ويساير الديناميات التنموية للي كتديرها بلادنا يقيادة سيدنا.
من غير هاد الشي، راه أخنوش كسب شرعية الانجاز ف 2024 بعد شرعية صناديق الاقتراع ف 2021، وللي ما عاجبوش هاد المسار الجديد للحزب، فسيتم إعمال مسطرة المحاسبة فحقو، يقول المصدر.
الإجتماع الجماهيري الكبير للي غا يترأسو عزيز أخنوش فأكادير نهار السبت 25 ماي، يقول المصدر، غا يكون إذن بمثابة تيرمينوس للعديد من الوجوه القديمة والمستهلكة ديال الأحرار وللي غادي يتطلب منها تقدر دقة المرحلة ومتطلبات المغرب للي باغي يكسب رهانات كأس العالم ف 2030، وقبل ذلك رهانات الاستحقاقات المقبلة ف 2026، وللي خاصها تفهم راسها وتغادر المشهد السياسي وتمشي ترتاح، وإلا.. والفاهم يفهم !
