كود -وكالات //

كاينين بزاف ديال عشاق الطاسة ما كيشربوش اي شراب فالريسطو بار، وكيبغيو يجيبو قرعة ديالهم باش يشربوها مع الماكلة، هاد الممارسة معروفة باسم “حق البوشون” (Droit de bouchon)، وهي فكرة جاية من الدول الأنغلوساكسونية، وكتسمح لكليان يجيب قرعتو، مقابل خلاص تمن قليل ديال السربيس.

فبريطانيا، هاد العادة شعبية بزاف وكتلقاها فبزاف ديال المطاعم، خاصة الصغيرة والآسيوية (بحال الهندية واللوبنانية) لي ما عندهاش رخصة بيع الكحول (Alcohol Licence). المطاعم كيستغلو هاد الفكرة باش يجذبو الكليان لي كيبغي يوفر فلوس الشراب الغالي، الكليان كيخلص غير تمن رمزي كيتسمى “Corkage fee” كيبدا من جنيهات قليلة على كل قرعة، ومقابل هاد التمن الساقي (Le serveur) كيحل القرعة وكيجيب الكيسان المناسبة.

ففرنسا، هاد الحق موجود من الناحية العملية، ولكن ما كاين حتى قانون كيلزم المطاعم يطبقوه. يعني القرار كيبقى بيد مول المطعم، يقدر يقبل أو يرفض ،وإذا وافق، كيحدد الثمن اللي غالباً كيتراوح بين 4 و15 أورو لقرعة.

أما فالريسطورات لي عندهمش رخصة ديال الطاسة بحال بزاف لي كاينين فالمغرب فكتبقى هاد القضية عملية بالنسبة ليهم ولكليان لي كيبغي يدوز ماكلتو بشي قريعة باردة،الشي لي غادي يخلي الإقبال و الرواج إلا تقننات هاد الممارسة خصوصاً وان المغرب مقبل على المونديال.