كود – وكالات//

بعض السوبرمارشيات الكبار ففنلندا، بحال K-Supermarket وS-Market، بداو كيستعملو سلة تقضية وردية مخصصة للعزّاب، باش يسهلو عليهم يتعارفو وسط السوبرمارشي بلا تطبيقات ديال المصاحبة.

القفة سميتها”Sinkkukori”، أي واحد ولا وحدة باغيين يتعرفو على ناس جداد، كيهزوها كرسالة بسيطة للناس اللي دايرين بيه بأن مولاها مرحب بالهضرة والتعارف.

الفكرة ما فيها لا تسجيل، لا تطبيق، لا شي التزام، غير إلا شاف شي واحد شخص آخر هاز القفة الوردية، يقدر يهضر معاه بشكل عادي، على شي سلعة ولا أي موضوع آخر، وإذا تفاهمو كيكملو التعارف.

المبادرة كاين اللي شافها فكرة زوينة كترجع التعارف الحقيقي بين الناس، وكاين اللي قال باللي غير حركة تسويقية باش تجب الانتباه للسوبرمارشي.