كود – عن tf1info//

واحد لفوايجور ففرنسا تفرضات عليه خطية 200 أورو حيث كان كيتفرج ففيديو فالتلفون بلا ما يدير ليزيات وهو فتران لي تابع  SNCF ، الكنترولات اعتابرو الصوت لي خارج من التيلفون كيبرزط لي راكبين حداه.

القانون الفرنسي كيعطي الحق للمراقبين يدخلو فحال هاد الحالات، حيث أي صداع كيقدر يتصنف “تبرزيط “وسط النقل العمومي و الغرامة كتكون قل إلا تخلّصات فبلاصتها، وكتطلع إلا تخلصات من بعد.

ولكن القضية ما بقاتش غير مخالفة عادية، تحوّلات لنقاش فالإعلام ومواقع التواصل. كاين لي قال خاص الصرامة باش يبقى القطار فضاء هادئ ومحترم، خصوصا وأن بزاف ديال الناس كيسافرو باش يرتاحو ولا يخدمو. وكاين لي شاف بلي 200 أورو بزاف على تصرف ممكن يكون غير عفوي، وكان يكفي تنبيه فالأول.

متابعين اقترحو يتعمم نفس الإجراء فالمغرب  حيت الهضرة فالتفلون ولا استعمال السماعات وسط النقل العمومي كتخصر  الذوق العام وكديرونجي الركاب.

https://www.tf1info.fr/societe/video-la-deuxieme-cause-de-desagrement-un-usager-de-la-sncf-ecope-d-une-amende-de-200-euros-pour-avoir-ecoute-de-la-musique-trop-fort-2426599.html