كود -وكالات//

كشفات دراسة أمريكية جديدة على أن ليام لي كيخرجو فيها الألبومات الموسيقية الكبيرة كيطلعو فيها الوفيات المرتبطة بالكسايد بنسبة 15.1%.

الباحثين حللو 233 ألف و809 حالة وفاة بسبب الكسايد بين 2017 و2022، واعتمدو على بيانات رسمية خاصة بالحوادث المميتة، مني ركزو على 10 ألبومات من بين أكثر الإصدارات لي تسمعو فالنهار الأول، واللي من بينها ألبومات لتايلور سويفت، دريك، باد باني، كيندريك لامار وهاري ستايلز.

الدراسة، اللي تنشرات فمجلة JAMA Network Open، قارنت عدد الوفيات فالأيام اللي تطرحات فيها هاد الألبومات مع الأيام العشرة اللي سبقات كل إصدار والأيام العشرة اللي من بعدو.

النتائج بينات أن الناس  سمعو للموسيقى من الإنترنت بمعدل 123.3 مليون مرة فنهار لي خرجو فيه الألبومات، مقابل 86.1 مليون مرة فالأيام الأخرى، يعني زيادة كتقارب 43%.

وفنفس الوقت، طلع معدل الوفيات لي جاية من لكسايد ب120.9 حالة  فالأيام لي خرج فيها الالبومات ل139.1 حالة فالنهار اللي تطرحات فيه الألبومات، أي بزيادة قدرها حوالي 18 وفاة يومياً، أو 15.1%.

وبشكل إجمالي، قدرو الباحثين أن  182 واحد توفاو بالكسايد فالأيام لي خرجات هاد الألبومات العشرة، مقارنة مع العدد اللي كان متوقعاً بناءً على الأيام المحيطة بها.

گود سبق ليها تنبهات لهاد الضاهرة مني سولات الفنان عبد العزيز أحوزار فحوار خاص على واش بصح الناس لي كيسمعو ليك وهوما سايقين كتقلب بهم الطوموبيل قبل ما ينفي لنا الفرضية ويقول لي كيعرف يسوق راه كيسوق.