كود -وكالات//

طلقات السلطات الصينية روبوتات كتنظم الطريق فإطار التوجه ديالها لاستعمال الذكاء الاصطناعي فالتدبير الحضري.

الروبوت اللي سميتو “هانغشينغ 1” هو أول نموذج من هاد النوع، وتصاوب باش يدير خدمة ديال بوليسي المرور، بحال توجيه السيارات والراجلين، ويسجل المخالفات بطريقة أوتوماتيكية، الطول ديالو كيوصل تقريباً لـ1.8 متر، ومجهز بكاميرات وأجهزة استشعار مطورة، والحركات ديالو جاية من رجال الشرطة، وفيه صفارة رقمية كتخدم مع إشارات المرور.

https://www.facebook.com/share/v/1CLMKZPM4W/

فعطلة عيد العمال ففاتح ماي 2026، نشرات  السلطات 15 روبوت فعدد من التقاطعات الرئيسية، المهمة ديالهم كانت هي تنظيم السير، ويگيدو لي تالفين على الطريق ويعاونو البوليس  فخدمتهم اليومية.

ومن بين الميزات ديال هاد الروبوتات أنها كتقدر تخدم بشكل مداوم ما بين 8 حتى لـ9 ساعات، وهاد الشي كيعاون فالتخفيف من الضغط على البوليس، باش يركزو أكثر فالقضايا الصعيبة.

وماشي غير السيارات اللي كيراقبو، حتى السلوكات الهرگاوية بحال قطيع الطرقان من بلاصة ممنوعة ولا حريك ضو الحمر، واحتلال الرصيف وكيعطيو حتى تنبيهات صوتية ديريكت للمخالفين مع تسجيل مخالفتهم.