كود -عثمان الشرقي //
عرفات مدينة تطوان واحد المحاضرة لي نظمها مؤخرا الفرع الطلابي ديال منظمة التجديد الطلابي على القضية الفلسطينية,اللقاء اللي كان على الدعم الإنساني والسياسي لفلسطين، تحول لساحة ديال النقاش على الهوية اللغوية ديال المغاربة، بسباب تصريحات ديال واحد المصرية اسمها أمل خليفة.
الباحثة المصرية صيفطات ميساج للمغاربة وقالت ليهم: «كنوجّه ليكم رسالة آ المغاربة، بدّلو اللهجة ديالكم بشي لهجة بسيطة، وهضرو بلهجة معروفة اللي يفهمها كلشي ، وتعلّمو العربية الفصحى، حيت حنا ما كنفهموش الدارجة ديالكم، واش خاصنا نجيبو مترجمين باش نفهموكم؟».
هاد التصريحات كتعكس عقلية قديمة، كتشوف باللي اللهجة ديال الشرق هي المعيار الكوني ديال التواصل والإسلام والعروبة ، فالمقابل لهجات الغرب الإسلامي بحال يلا هي “نشاز” و”انحراف” لغوي خاصو يتقاد .
باش تجي وحدة من آخر الدنيا ، وتطلب من شعب كامل يبدل هضرتو اليومية ووجدانو الشفهي غير باش تفهمنا هي ، راه هادي هي قمة الفوقية والاستعلاء الثقافي .
الدارجة المغربية جزء من الهوية الثقافية ديال المغاربة، وعندها تاريخ طويل وتطوّر خاص بها، بحال اللهجات ديال الشعوب الاخرى، والاختلاف فطريقة الكلام ما خاصوش يكون سبب باش شي طرف يفرض على طرف آخر كيفاش يهضر
المنظمين ديال التجديد الطلابي، بلاصة ما يوقفو هاد السيدة عند حدها ملي بدات كـتطاول وتخربق، جلسو مربعين يديهم ، وسمحو ليها تنصب راسها قاضي ومفتش لغوي كيعاود الترابي للمغاربة فـبلادهم.
هاد السكات ديال المنظمة كيبين بلي التجديد الطلابي كيعانيو من عقدة نقص قدام أي واحد جاي من الشرق، السيدة كـتجلد فـالدارجة المغربية وفالأمازيغية وهما عاجبهم الحال، غير حيت فكرهم الإيديولوجي مبرمج على تقديم الولاء للمشرق على حساب كرامة وتمغربيت ديال بلادهم.