كود سبور//

خرج الدولي المصري السابق أحمد حسام الملق بـ “ميدو”، على السطر وهو كايحاول يطبل لجمهور الأهلي المصري باش يصلح علاقتو معهم حيث معروف زملكاوي، وناض وجه اتهامات خطيرة مسيئة للمغرب، وهاذ الشي غير باش يدافع على الأهلاويين بعد أحداث الشغب اللي دارو البارح الاحد ضد فريق الجيش الملكي ضمن منافسات دوري أبطال افريقيا، مع العلم أنه كان مشاغب وروفيكس وهو أسوء نموذج ديال اللعابا، وشابع قلة انضباط واحترام واحترافية والواقعة ديالو مع منتخب مصر فكاس إفريقيا 2006، نهار ضارب مع المدرب المخضرم حسن شحاتة أسطورة الكورة والتدريب فمصر راه أكبر دليل على شنو كايسوا.

المصري ميدو اللي ولى محلل ومقدم برامج فمصر، مازال ما دار عقلو، ونشر تغريدة على “X”، قال فيها اتهامات خطيرة على المغرب: “في حلقة جديدة من مسلسل المثالية الفارغة إعلامنا بيهاجم جمهور الأهلي علشان رموا أزايز مياه على لاعيبة ‫الجيش الملكي بيحاولوا يحولوا جمهور الكورة لجمهور تنس بمزاجهم!! فرقة جمهورها شتم لاعيبتي ورماها بالأزايز والماتش اتلعب في المغرب في وسط أجواء إرهابية كلنا تابعناها عايزين من الجمهور لما الفرقة دي تيجي ملعبي أعمل إيه معاهم؟ ارمي عليهم بوكيهات ورد ودباديب بمناسبة”.

هاد الكلام ديال احمد حسام راه خطير بزاف، خصوصا وأنه صادر من شخص اللي عندو متابعين، ومصر ما خاصهمش يدوزو له هذا الشي وهذا الكلام الموجه لبلد شقيق بحال المغرب، مع العلم أن ماتش الذهاب بين الجيش الملكي والأهلي المصري عرف أحداث ومناوشات ولكن هذا الوصف ديال الإرهاب راه صعيب بزاف وماشي صحيح.