وكالات //

تلغى الحفل ديال قائد الأوركسترا الروسي المعروف، فاليري غيرغييف، اللي كيدعم الرئيس فلاديمير بوتين، وكان مبرمج يتدار فـ27 يوليوز فمهرجان حدا مدينة نابولي فإيطاليا، حسب ما علنوا عليه المنظمين ديال الحدث البارح الاثنين.

إدارة المهرجان قرّرات “تلغي الحفل السمفوني اللي كان غادي يقودو فاليري غيرغييف”، على حساب البلاغ اللي خرجو به، من بعد ما جاتهم انتقادات كثيرة من إيطاليا ومن برا.

فاليري غيرغييف، اللي كيسيًر مسرح بولشوي المعروف فموسكو وكيعتابر من صحاب الرئيس الروسي بوتين، كان غادي يحيي حفل فمهرجان “أونيستاتيه دا ري” (صيف الملك)، اللي كيتدار فـقصر كازيرتا، المقر القديم ديال عائلة بوربون الملكية فـنابولي.

وما عمر شي جهة غربية عاودات عيطات لفاليري غيرغييف مللي بدات الحرب فأوكرانيا فـ2022، حيت رفض يندد بالحرب الروسية على أوكرانيا.