كود سبور//

غاتخلي الجامعة الملكية المغربية لكرة القدم اللاعبين ديال الجيش الملكي اللي عيط لهم طارق السكتيوي للمعسكر التدريبي للمنتخب الوطني المغربي لأقل من 23 عام، لمواليد عام 2000 والفوق، باش يبقاو مع الفريق العسكري المقبل على ربع نهائي دوري أبطال إفريقيا.

وقدمت إدارة الجيش الملكي طلب رسمي إلى الجامعة الملكية المغربية لكرة القدم للسماح للاعبين ديال ليفار بالالتحاق سريعا بالفريق، حرصا على توفير أفضل الظروف التحضيرية للاستحقاقات المقبلة، وضمان جاهزية المجموعة للدفاع عن ألوان النادي والمغرب فدوري أبطال أفريقيا، وغايرجعو اللاعبين ديال ليفار للفريق ديالهم بعد الماتش الودي الأول للمنتخب المغربي لأقل من 23 ضد غينيا اللي ملعوب اليوم الاحد فتيران القنيطرة.

وكايوجدو الجيش الملكي لربع نهائي دوري أبطال إفريقيا، اللي غايلعبو فيه مع بداية أبريل الجاي ضد فريق بيراميدز المصري، وماتش الذهاب غايكون فمصر والروتور فالمغرب.