الوالي الزاز -كود- العيون///
[email protected]

وزير الشؤون الخارجية والتعاون الأفريقي والمغاربة المقيمين في الخارج، ناصر بوريطة، وواخا الهفوة ديال مقعد نائب رئيس مفوضية الإتحاد الأفريقي اللي مازال مابردات خرج علينا بقاموس جديد عمرنا سمعناه فالمغرب.

هاد الوزير كيصحاب راسو فوق الكل، فوق رئيس الحكومة وفوق الوزراء الآخرين وعطا لراسو لقب وصفة جديدة المغاربة عمرهم سمعو بيها غير فأفلام عادل إمام.

بوريطة خالف گاع القواميس اللي دازت فالمغرب، واللي كانت مخصصة فالأصل لتقدير الملك والتعبير عن إحترامه من طرف الشعب والمؤسسات، وناض يا سيدي أصبح يُلقب نفسه بـ “معاليه” فالصفحة الرسمية ديال الوزارة، وهو الشي اللي عمرو كان فتاريخ المغرب.

الوزير بوريطة فالصفحة الرسمية ديال الوزارة اللي ماشي ديالو وما غادي يبقى خالد فيها كاتب خلال استقبالو لسفيرة ألبانيا فالمغرب: “‏استقبل السيد ناصر بوريطة، اليوم بالرباط، السيدة أنتيلا جيكا، التي قدمت لمعاليه نسخا من أوراق اعتمادها بصفتها سفيرة مفوضة فوق العادة لجمهورية ألبانيا (مقيمة بمدريد) لدى صاحب الجلالة الملك محمد السادس، نصره الله وأيده”.

كيفاش هاد معاليه ؟ كيفاش وصلنا لهاد الدرجة ديال الأنانية وحب الذات، راه الوحيد اللي ممكن نعطيوه ألقاب تقدرو وتحتارمو هو سيدنا أما أنت راك غير خدام عند المغاربة وما غاديش تفرض على المغاربة يسميوك “معاليه” وبا يعطوها ليك كلقب.